नेपाली सांगीतिक क्षेत्रमा भविष्य बनाउन लागिपरेकी प्रतिभा हुन्— प्रकृति थलङ । ताप्लेजुङको नाङखोल्याङमा २०४८ सालमा जन्मेर धरानबाट एसएलसी पास गरेकी उनी हाल काठमाडौंमा संघर्षरत छिन् । उनी बागीना कला केन्द्र धरानले आयोजना गरेको पूर्वाञ्चल सिंगिङ स्टार २०७१ की विजेता पनि हुन् । २०७१ सालमा पहिलो पट ‘तिम्रो मेरो मायाको' बोलको गीत रेकर्ड गराई गायनयात्रा आरम्भ गरेकी उनको स्वरमा डेढ दर्जन गीत रेकर्ड भइसकेको छ ।
गायनमा कसरी लाग्नुभयो ?
मलाई सानैदेखि गायनमा रुचि थियो । परिवारमा सांगीतिक माहोल थियो । बुबा केन्द्रविक्रम थलङ गीत लेख्नुहुन्थ्यो । उहाँका गीत निकै रेकर्ड भएका छन् । दाइहरू कुशल थलङ, कञ्चन थलङ मैले पनि बुबाको गीत गाएका छौं ।
तपाईंलाई गीत संगीतमा के कुराले आकर्षित गर्छ ?
आफूले चाहेको क्षेत्रमा त्यसै आकर्षित भइन्छ । फेरि गीत संगीत भनेको नाम, काम, दाम सबै पाइने क्षेत्र पनि हो ।
आफूले गाएकामध्ये मनपर्ने गीत ?
मेरो स्वरमा डेढदर्जन गीत रेकर्ड भएका छन् । तीमध्ये दर्शन राईको शब्द, महेन्द्र राईको संगीत रहेको ‘तिम्रो हेराईले मार्यो नि मलाई' मनपर्छ । गीतको भाव राम्रो छ । स्टेजमा पनि गाउन मिल्छ ।
कस्तो गीत गाउन रहर लाग्छ ?
मलाई अलि भावनात्मक गीत मन पर्छ । चाहे पप होस् वा आधुनिक ।
गायिकाहरू पनि ग्ल्यामरस बन्ने समय आएको हो ?
अहिले आवश्यक छ । ग्ल्यामरस छवि कलाकारका लागि प्लस प्वाइन्ट हुन्छ ।
आफू कत्तिको ग्ल्यामरस छु जस्तो लाग्छ ?
आफूलाई त्यस्तो ग्ल्यामरस छु जस्तो त लाग्दैन तर फिट एन्ड फाइन रहनुपर्छ भन्ने चाहिँ लाग्छ ।
आफूलाई फिट एन्ड फाइन राख्न के गर्नुहुन्छ ?
म नृत्य गर्छु । खानपानमा ध्यान दिन्छु ।
प्रतिक्रिया दिनुहोस !
