चाउरीपना चट
मानिसको छालामा डर्मिस, इपिडर्मिस र हाइपोडर्मिस गरी तीन तहहरू हुन्छन् । डर्मिस तहभित्र इलास्टिन, कोलाजेन र फाइब्रोब्लास्टजस्ता तहहरू हुन्छन् । यी तीन तहका मांसपेशी कमजोर भएमा छालामा चाउरीपना आउँछ । यि तीन तहलाई बलियो बनाउन स्तरीय क्रिम लगाए मात्रै पनि छालामा आउने चाउरीपना कम हुँदै जान्छ । सही तत्व भएको क्रिम छनोट गरेमा त्यसले छालामा चाउरीपना हुने प्रक्रियालाई कम बनाउँछ ।
छाला सुक्खा भयो भने त्यसमा छिटो चाउरीपना आउँछ । त्यसैले राम्रो म्वाइस्चर लेबल भएको म्वाइस्चराइजर अथवा क्रिम लगाउने गर्नुपर्छ । जाडो मौसममा छाला अझै बढी सुक्खा हुने हुनाले म्वाइस्चराइजरको मात्रा अझै बढाउनुपर्ने हुन्छ । हाम्रो छालाको पीएच लेबल सन्तुलनमा रहे कुनै पनि समस्या नआउने हुनाले क्रिमको छनोट गर्दा यसमा ध्यान दिन जरुरी हुन्छ ।
घर बाहिर निस्कनु अगाडि सधैं सनस्क्रिनको प्रयोग गर्ने गर्नुपर्छ । यसमा हुने तत्व टाइट्यानियम डाइअक्साइडले बूढो र कालो हुने प्रक्रियाबाट छालालाई बचाउँछ । त्यसैगरी स्टेरिक एसिड र स्यालिस्यालिक एसिड भएको क्रिम लगाउँदा पनि यसले छालाको बुढ्यौली हुने प्रक्रियालाई कम गराउँछ । चाउरीपना हटाउन हामीले लगाउने क्रिममा भिटामिन ए, बी, सी र ई हुनु जरुरी हुन्छ । त्यसैगरी म्यागनेसियम, जिंकलगायतका मिनिरल्स भएको क्रिमको प्रयोगले पनि चाउरीपनालाई कम गर्न सहयोग पुर्याउँछ ।
यदि सही तत्व भएको नाइट क्रिम उपलब्ध छैन भने हामीले प्रायः सधैं लगाउने क्रिमलाई पनि राति लगाएर सुते राम्रो नतिजा पाउन सकिन्छ । त्यसैगरी क्रिम छैन भने बोरोप्लसमात्रै लगाए पनि छालामा हुने हानिबाट बचाउन सकिन्छ ।
सही क्रिम नभएको अवस्थामा घरमै हुने दूधको तर लगाएर सुते पनि राम्रो हुन्छ । त्यसैगरी छालालाई पोषण दिएर चाउरीपना कम गर्न नरिवलको तेल, बदामको तेललगायत पनि प्रयोग गर्न सकिन्छ । सामान्यतया २५ वर्ष पछि अनुहारमा चाउरीपना आउन सुरु हुन्छ । त्यसैले २५ वर्षअगाडि साधारण म्वाइस्चराइजर लगाएमात्रै पुग्छ ।
तर उमेरले २५ नाघेपछि भने मिनरल्स र भिटामिनयुक्त क्रिम लगाउनुपर्छ । त्यसैगरी कम्तीमा पनि २० दिनको अन्तरालमा फेसियल गराउँदा छालाको अवस्थालाई सन्तुलनमा राख्न सकिन्छ । यदि अनुहारको छाला तैलीय प्रकारको छ भने धेरै चिल्लोयुक्त खानेकुरा खानु हुँदैन ।
कुराकानी गर्दा वा अन्य समयमा पनि रिसाउँदा वा खुसी हुँदा अनुहारको अभिव्यक्तिलाई धेरै परिवर्तन गरिरहँदा चाउरी पर्ने सम्भावना हुन्छ । त्यसैले सकेसम्म फेसियल एक्सप्रेसन धेरै दिनु हुँदैन । अनुहारको छालामा धेरै चाउरीपना परेको छ भने पार्लरमा गएर थेरापीमार्फत कम गराउन सकिन्छ ।
एमबीए गरेकी ब्युटी कन्सलट्यान्ट
ब्युटी कन्सलटेन्ट रीमा शर्मा सन् २००८ ताका चण्डीगढस्थित टाटा कम्पनीमा म्यानेजरका रुपमा कार्यरत थिइन् । त्यतिबेला उनको संगत केही ब्युटी थेरापिस्टसँग भयो । कोही विज्ञानमा स्नातकोत्तर गरेर यस पेसामा लागेका त कसैले चिकित्सक भइसकेपछि पनि यसलाई पेसा बनाउन थालेको पाइन् । यसबाट निकै प्रेरित भएर एमबीए गरेकी रीमाले पनि त्यहाँको भीएलसीसी इन्स्टिच्युटबाट कस्म्याटोलोजिस्ट विषयमा एकवर्षे कोर्स पूरा गरिन् ।
त्यसपछि चण्डीगढमै पार्लर खोलेर बसेकी रीमालाई काठमाडौंको लाजिम्पाटस्थित भीएलसीसीमा हेड अफ इन्चार्जको अफर आएपछि दुई वर्षसम्म सोही पदमा रहेर काम गरिन् । यसपछि गत वर्ष दसैंतिहारको अवसरमा उनले सुन्धारास्थित फेसन सस्तो बजारमा ब्रिलियर सलोन स्थापना गरिन् ।
सलोनमा उनले भारतको ब्रिलियर साइन्सको उत्पादन प्रयोग गरी विभिन्न समस्यामा थेरापी गर्दै आएकी छन् । फलफूल र सागसब्जीबाट बनेका प्राकृतिक वस्तुको प्रयोगले फेसियल गरिन्छ । त्यसैगरी रसायनको प्रयोगले कपालमा भएको हानिलाई कम गर्न, चाया र कपाल झर्ने समस्या हटाउन पनि थेरापी गर्ने गरिन्छ । प्राकृतिक वस्तुको प्रयोग हुने हुनाले नतिजा आउन केही समय लागे पनि यो दीर्घकालीन हुने उनको भनाइ छ ।
प्रतिक्रिया दिनुहोस !
