एयरपोर्टबाटै हरायो २५ सय डलर
काठमाडौं: त्रिभुवन अन्तर्राष्ट्रिय विमानस्थलबाट दक्षिणकोरियाली नागरिकको दुई हजार पाँच सय अमेरिकी डलर चोरी भएको छ ।झन्डै १५ वर्षदेखि नेपालमा व्यापार गर्दै आएका कोरियाली नागरिक हुवा इन सुकको रकम चोरी भएको हो । सुक शुक्रबार साँझ कोरियन एयरबाट काठमाडौं आएका थिए । दक्षिणकोरियाको इन्चोन विमानस्थलबाट काठमाडौं आउने क्रममा सुकले पैसा भएको झोला 'ह्यान्ड ब्याग' बनाएका थिए । कोरियाली नागरिकको पैसा चोरी भएको घटनाबारे आफूहरूलाई जानकारी नभएको विमानस्थल प्रहरीले जनाएको छ ।
'ह्यान्ड ब्याग' राख्ने ठाउँमा नअटेपछि कोरियन एयरका कर्मचारीले सुकको झोला अन्य सामान भएकै स्थानमा लगेर राखिदिएका थिए । सुकको अरू सामान कन्टेनरभित्र रहेकाले ह्यान्ड ब्यागमात्र कन्टेनरबाहिर पर्यो । त्यसमा सुकको अन्य सामग्रीका साथै पर्समा ५ हजार नेपाली रुपैयाँ र खामभित्र २ हजार ५ सय डलर थियो । उनले ल्याएको जम्मा तीन हजारमध्ये ५ सय डलर विमानस्थल अध्यागमनमा भिसा लिँदा चाहिने भिसा 'फी' तिर्न झिकेका थिए ।
शुक्रबार साँझ काठमाडौं ओर्लिएपछि सुकले 'ह्यान्ड ब्याग' हेर्दा खाममा भएको २ हजार ५ सय अमेरिकी डलर र पर्समा रहेको ५ हजार नेपाली रुपैयाँ नभएपछि विमानस्थल प्रहरीलाई खबर गरेको स्रोतले बताएको छ । कोरियाली नागरिकले रकम हराएको जानकारी दिएपछि विमानस्थलमा हल्लीखल्ली मच्चिएको थियो ।
'म पैसा हराएकोमा कुनै नेपालीलाई दोष लगाउन चाहन्नँ', कोरियाली नागरिक सुकले भने, 'मेरो हराएको पैसाभन्दा नेपाल र दक्षिणकोरियाको सम्बन्ध माथि छ ।' नेपाल एयरलाइन्सले कोरियन एयरको ग्राउन्ड ह्यान्डलिङको काम गर्दै आएको छ । नेपाल एयरलान्यसका कर्मचारीले कोरियन एयरबाट आउने सम्पूर्ण सामान झार्ने र ल्याउने काम गर्छन् ।
कोरियन नागरिकको पैसा हराएको थाहा पाएपछि विमानस्थल प्रहरीले कोरियन एयरका कर्मचारी, लोडर र ग्राउन्ड ह्यान्डलिङमा काम गर्ने नेपाल एयरलान्सका कर्मचारीलाई सोधपुछ गरेको स्रोतले बताएको छ । प्रहरीले सीसीटीभी दृश्य हेर्दा कसैले पैसा लगेको देखिँदैन । जहाजबाट सामान निकाल्ने क्रममै उक्त रकम चोरिएको हुनसक्ने विमानस्थल स्रोतले बताएको छ ।
सुन खोज्दा चाँदी भेटियो
विमानस्थलमा झन्डै एक महिनादेखि बेवारिस अवस्थामा रहेको झोला खोल्दा तीन किलो चाँदी भेटिएको छ । पुस २२ गते कुनै यात्रुले उक्त झोला बेवारिस छाडेका थिए । लामो समयसम्म झोला बेवारिस रहेपछि विमानस्थल प्रहरी र भन्सारका कर्मचारीले शुक्रबार झोला खोल्ने निर्णय गरेका थिए ।
झोलामा एकएक किलो चाँदीका तीनवटा बिस्कुट फेलापरेको प्रहरी स्रोतले बताएको छ । बेवारिस झोला खोल्नुअघि भन्सारका कर्मचारीले उक्त झोला 'स्क्रिनिङ मेसिन' मा हालेका थिए । मेसिनले झोलाभित्र मेटल भएको संकेत गरेपछि भन्सार कर्मचारीले ठूलो परिमाणमा सुन भएको आशंका गर्दै झोला खोलेका थिए । झोला कसको हो भन्नेबारे केही खुलेको छैन । पुस २२ गते ती यात्रु जेट एयरमा भारतको मुम्बईबाट आएका थिए ।
अमेरिकाबाट आएका व्यक्ति मुम्बई हुँदै काठमाडौं आएको र पक्राउ परिने डरले झोला छाडेर गएको हुनसक्ने प्रहरीले बताएको छ । बरामद चाँदी उच्च गुणस्तरको रहेको विमानस्थलका भन्सार कार्यालयका एक अधिकारीले अन्नपूर्णलाई बताए ।
प्रतिक्रिया दिनुहोस !
