जन्मिएको दुई घन्टामै चोरी भएका शिशु तीन दिनपछि भेटिए : एक महिला पक्राउ

वीरगन्ज : वीरगन्जको नारायणी उपक्षेत्रीय अस्पतालबाट शुक्रबार जन्मिएको दुई घन्टा नबित्दै चोरी भएको शिशु आइतबार भेटिएका छन् । प्रहरीले शिशु चोरी कार्यमा संलग्न लालसा देवीलाई पर्साको बेलवा गाविस ९ मिलनचोकबाट पक्राउ गरेको हो। 

वीरगन्ज १ छपकैयाकी आशा देवीले अस्पतालमा शुक्रबार बिहान पौने ११ बजे जन्माएको नवजात शिशु (छोरा) एक अपरिचित महिलाले शुक्रबार दिउँसो डेढ बजे अस्पतालको बेडबाटै चोरेकी थिइन् ।

अस्पतालको शैयाबाटै शुक्रबार दिउँसो चोरी भएको नवजात शिशु शनिबार साँझसम्म फेला पर्न नसक्दा आमा आशादेवीको स्वास्थ्य अवस्था नाजुक बन्दै गएको थियो । 

अपरिचित एक महिलाले अस्पतालको बेडबाट बच्चा चोरेर फरार भएकी थिइन् । शुक्रबार अस्पतालबाट चोरी भएको बच्चासहित ती महिलालाई प्रहरीले आइतबार दिउँसो पर्साको बेल्वामा फेला पारेको प्रहरी नायब उपरीक्षक चक्रराज जोशीले जानकारी दिए।

बच्चा चोरी भएपछि बच्चाका अभिभावक र गाँउलेले दुई दिनसम्म अस्पतालमा प्रदर्शन गरेका थिए । शनिबार दिउँसो अस्पतालमा भएको वार्तामा प्रहरी र अस्पताल प्रशासनले चोरी भएका बच्चाको खोजी गर्न प्रतिबद्धता जनाएपछि शनिबार दिउँसो ३ बजेदेखि प्रदर्शन स्थगित भएको थियो ।

याे पनि पढ्नुहाेस् 

बिहेको पाँच वर्षसम्म बच्चा नजन्मिएपछि शिशु चोरेको खुलासा