पार्टी मिल्यो, मन मिलेन !

भक्तपुर : राष्ट्रिय प्रजातन्त्र पार्टी र राष्ट्रिय प्रजातन्त्र पार्टी नेपालबीच एकीकरण भएर एउटै पार्टी बने पनि भक्तपुरमा दुई पार्टीका नेता तथा कार्यकर्ताहरुको मन मिल्न सकेको छैन ।

एकीकृत पार्टीको महाधिवेशनको निम्ति जिल्लामा भएको नगर तथा क्षेत्रीय अधिवेशनको क्रममा यस्तो स्थिति देखिएको हो। दुई पार्टीमध्ये कुन पार्टीका नेता हावी हुने भन्ने प्रतिस्पर्धा स्पष्टै देखिएको छ । जसअनुसार राप्रपा नेपाल पक्षीय बढी हावी भएको स्थानीय नेताहरुले बताएका छन् ।

उनीहरुका अनुसार राप्रपा नेपालका नेताहरुले राप्रपा आफ्नो पार्टीमा विलय हुन आएको जस्तो गरी हैकम देखाउँदै आएका छन् । यसले गर्दा पार्टी एकीकरण भए पनि दुई पार्टीका नेता तथा कार्यकर्ताहरुबीच मन मिल्न नसकेको पुष्टि भएको उनीहरुको भनाइ छ ।

उनीहरुले यही स्थिति जारी रहे महाधिवेशनपछि पार्टी एकीकरण नभई झन् दुई पार्टी स्पष्टसँग अस्तित्वमा आउने दावी गरे।

जिल्ला अधिवेशनका लागि भएका नगर र क्षेत्रीय अधिवेशनमा राप्रपा र राप्रपा नेपाल स्पष्ट छुट्टिने गरी दुइटै पार्टीको छुट्टाछुट्टै प्यानलसहित प्रतिस्पर्धा भएको छ ।

उम्मेदवारीसँगै प्रचारप्रसारमा समेत दुई पार्टी स्पष्ट देखिएको थियो । हिजो राप्रपामा भएका नेता तथा कार्यकर्ताले आफ्ना उम्मेदवारको पक्षमा प्रचारप्रसार गरेका थिए भने राप्रपा नेपालका नेता कार्यकर्ता पनि आफ्नै पक्षका उम्मेदवारको प्रचारप्रसारमा थिए ।

माघ २६ गते हुने जिल्ला अधिवेशनमा समेत राप्रपा र राप्रपा नेपालका छुट्टाछुट्टै नेताहरुले जिल्ला अध्यक्षमा उम्मेदवारी दिने तयारी गरिरहेका छन् । जिल्ला अध्यक्षको लागि राप्रपाको तर्फबाट रामशरण लामिछाने र राप्रपा नेपालको तर्फबाट सांसद एवं पार्टीका केन्द्रीय सदस्य दिनेश श्रेष्ठ लागिपरेका छन् ।

उनीहरु जिल्लाको नेतृत्व हत्याउनकै लागि पार्टीको नगरदेखि क्षेत्रीय अधिवेशनसम्म लागिपरेका छन् । जसअनुसार उनीहरुले जिल्लाका ६ नगरपालिका र दुई निर्वाचन क्षेत्रमा आधा आधा नेतृत्व आफ्नो पक्षमा पार्न सफल भएका छन् ।

भक्तपुर, चाँगुनारायण र नगरकोट नगरमा राप्रपा पक्षले जीत हात पारेको छ भने मध्यपुर थिमि, सूर्यविनायक र अनन्तलिंगेश्वर नगरमा राप्रपा नेपाल पक्ष विजयी भएको छ । जसअनुसार भक्तपुरमा राजेन्द्र लाखा, चाँगुनारायणमा उमेश प्रधान र नगरकोटमा धनबहादुर लामा नगर अध्यक्षमा निर्वाचित भए ।

उता मध्यपुरमा भूवन वाग श्रेष्ठ, सूर्यविनायकमा प्रवीण ढुंगेल र अनन्तलिंगेश्वरमा रामप्रसाद न्यौपाने नगर अध्यक्षमा विजयी भए ।

त्यस्तै आइतबार परिणाम आएको क्षेत्रीय अधिवेशनअन्तर्गत १ नम्बरमा राप्रपा र २ नम्बरमा राप्रपा नेपाल पक्षले जीत हात पारेको छ । क्षेत्र नम्बर १ मा राप्रपा पक्षीय बच्चुराम पराजुलीले राप्रपा नेपाल पक्षका श्यामप्रसाद नेपाललाई पराजित गरेका छन्।

क्षेत्र नं २ मा भने राप्रपा नेपाल पक्षका नारायण थापाले राप्रपा पक्षका रामहरि थापालाई पराजित गरेका छन् । पराजुली र थापाले आआफ्नो पूरा प्यानलसहित जित हासिल गरेका हुन् ।

एक अध्यक्षसहित २९ सदस्य जिल्ला कार्य समितिमा १९ जना अधिवेशनबाट निर्वाचित हुने प्रावधान छ । बाँकी ३५ प्रतिशत निर्वाचित अध्यक्षले मनोनीत गर्ने विधानमा उल्लेख छ ।

जिल्ला अधिवेशनको लागि भक्तपुरका दुई क्षेत्रीय समिति, ६ नगर समिति र ९३ वडा समितिका कूल दुई सय ४८ जना प्रतिनिधिले मतदान गर्न पाउने जिल्ला निर्वाचन अधिकृत विकल श्रेष्ठले जानकारी दिए ।