सरकारी संयन्त्र र ठेकेदार नै देश विकासका बाधक

काठमाडौं : सरकारी संयन्त्र र ठेकेदारको लापरवाही मुलुकको आर्थिक विकास र सम्वृद्धिका मुख्य बाधक बनेको सांसदले बताएका छन्। संसद्को विकास समितिको मूल्यांकन प्रतिवेदनमाथि आइतबार संसदमा भएको दुई घण्टा लामो छलफलमा सांसदहरुले मुलुक आर्थिक सम्वृद्धिको दिशामा जानुको विकल्प नभएको बताए ।

समिति सभापति रविन्द्र अधिकारीले विभिन्न आयोजना निर्माणका लागि समितिले दर्जनौ निर्देशन दिए पनि तिनिहरुको कार्यान्वयनमा ढिलाई भइरहेको बताए । ‘हाम्रा नेताहरु धुँवा धुलो खांदै भन्नुहुन्छ, हाम्रो देश यस्तै हो,’ अधिकारीले भने,‘हाम्रो यो मानसिकताले मुलुक उभो लाग्छ त ? ’ १४ वटा चरण पार गरेका योजना मिल्काएर मन्त्रीका खल्तीबाट छानिने योजनाले मुलुक आर्थिक सम्वृद्धिको बाटोमा नजाने उल्लेख गर्दै अधिकारीले भने, ‘अब विकास प्रशासनका लागि बहस जरुरी छ ।’

एमाले सांसद केशव बडालले मुलुकको आर्थिक सम्वृद्धिका लागि महत्वपूर्ण मानिएको काठमाडौं निजगढ फास्टट्रयाक र निजगढ विमानस्थलको काम सरकारले अघि नबढाएको भन्दै असन्तुष्टि पोखे ।

एमालेकै अर्का सांसद रामकुमार भट्टराईले राष्ट्रिय गौरवका आयोजनाको नाम सुन्दा नै तर्सिनुपर्ने अवस्था रहेको बताए । ‘विकासका लागि आवश्यक ढुंगा, माटो, बालुवा निकाल्ने ठाउँ राज्य तोक्नुपर्‍यो,’ उनले भने, ‘केही मुठिठ्भर मान्छेले यी स्रोतमाथि कब्जा जमाउँदा निर्माण सामग्रीको अभाव देखिन थालेको छ ।’

कांग्रेसका सांसद रामहरि खतिवडाले राजधानी काठमाडौंको अवस्थाले नै मुलुकको विकासलाई गिज्याइरहेको बताए । ‘राजधानीको नाम नै परिवर्तन गर्नुपर्ने हो कि,’ खतिवडाले भने,‘ शुरुमा ‘ल’ भन्यो त्यसपछि खन्यो, अनि पु¥यो, त्यसैले यसको नाम नै खन्ने र पुर्ने भएकाले लखनपुर राख्ने हो कि ।’

एमाले सांसद प्रेम आलेले एउटै ठेकेदारले १० वटा ठेक्का लिने र समयमा काम सम्पन्न नगर्ने मुख्य समस्याका रुपमा देखा परेको बताए । ‘समयमा काम नगर्ने ठेकेदारलाई कालोसूचीमा राखेर कारवाही गरौ न,’ आलेले भने, विकासको मेरुदण्ड सडक हो । फास्ट ट्रयाकलगायतका राष्ट्रिय गौरवका आयोजना समयमै सम्पन्न गरेर मुलुकको कालापलट गर्न सकिन्छ ।’ माओवादी केन्द्रका सांसद रामनारायण विडारीले मुलुकमा विकास भन्दा भ्रष्टाचार बढेको बताए ।

सभासदहरुका प्रश्नको जवाफमा भौतिक पूर्वाधार मन्त्री रमेश लेखकले गुणस्तरीय निर्माण र समयमै काम सम्पन्न गर्नुपर्ने विषय विकास निर्माणमा मुख्य चुनौती बनेको बताए ।

हुलाकी सडकको काम अघि बढेको, फास्ट ट्रयाकबारेको अध्ययन समितिको प्रतिवेदन पछि काम अघि बढने र काठमाडौंमा मेट्रो रेल निर्माण कार्यलाई सरकारले प्राथमिकतासाथ अघि बढाउने मन्त्री लेखकले बताए।