आईएसआई एजेन्ट पक्राउ
वीरगन्जः नेपाल प्रहरीले दुई भारतीयको हत्यामा संलग्न भएको आरोप लागेका नेपाली सम्सुल होदालाई दुबईबाट पक्राउ गरी कलैया ल्याएको छ ।
बारा कलैया नगरपालिका ८ का होदामाथि भारत आदापुरका दीपकराम र अरुणरामको हत्यामा संलग्न भएको आरोप लागेको थियो । दीपकराम र अरुणरामका शव पुस १३ गते बाराको हरैया जंगलमा घाँटी रेटिएको अवस्थामा फेलापरेको थियो । पाकिस्तानको जासुसी संस्था आईएसआईको निर्देशनमा भएको हत्यामा होदाको संलग्नता रहेको खुलेको थियो ।
दुबईमा बसेर आईएसआईका लागि काम गरेको आरोप लागेका होदालाई नेपाल प्रहरीले इन्टरपोलको सहयोगमा दुबईबाट पक्राउ गरी कलैयामा सोमबार ल्याएको हो । प्रहरीले ती दुई भारतीयको हत्यामा संलग्न गरेको आरोपमा बाराको महागढीमाई नगरपालिकाको सिमरा तेगछियाका गिरी बाबा भनिने बृजकिशोर गिरी, कलैया नगरपालिका १० रंगपुरका मोजाहिद्दिन अन्सारी र शम्भु भनिने लड्डुलाई यसअघि नै पक्राउ गरिसकेको छ । होदालगायत उनीहरू सबैलाई जिल्ला प्रहरी कार्यालय बारामा राखिएको छ ।
दुबईबाट पक्राउ गरी ल्याइएका होदासहित चारैजनालाई मंगलबार जिल्ला प्रहरी कार्यालय बारामा पत्रकारसम्मेलन गरी सार्वजनिक गरिने बारा प्रहरीले जनाएको छ । बाराका प्रहरी उपरीक्षक नरेन्द्रप्रसाद उप्रेतीले भने, ‘घटना र पक्राउ आरोपितबारे मंगलबार पत्रकारसम्मेलनमा जानकारी गराउनेछौं ।'
अहिले पक्राउ परेका चारजनामध्ये केहीको मोबाइलमा हरैया जंगलमा ती दुई भारतीयको हत्या गर्दाको भिडियो रेकर्डिङसमेत फेलापरेको अनुसन्धानमा संलग्न एक प्रहरी अधिकृतले बताए ।
नेपालमा आईएसआईको एजेन्टका रूपमा काम गर्दै आएका दुबईमा रहेका कलैयाका होदाकै निर्देशनमा भारतीय दीपक र अरुणको हत्या गरिएको तथ्य प्रहरी अनुसन्धानमा खुलेको थियो ।
अक्टुबर १ मा बाराको सिमाना जोडिएको भारतको घोडासहनस्थित रेलवे ट्र्याकमा बम राख्न होदाले बाराको महागढीमाई नगरपालिकाको सिमरा तेगछियका बृजकिशोर गिरीमार्फत रक्सौल गम्हरीका उमाशंकर पटेललाई ६ लाख भारतीय रुपैयाँ अग्रिम दिएको खुलेको थियो ।
बारा प्रहरीका अनुसार उमाशंकरले रेल्वे ट्र्याकमा बम राख्न मृतक दुई भारतीयलाई जनही ३÷३ लाख भारतीय रुपैयाँ दिएका थिए । बम विस्फोट भएपछि दीपक र अरुणलाई कुल ३० लाख भारतीय रुपैयाँ दिने सहमति उनीहरूबीच भएको प्रहरी स्रोतले बतायो ।
तर दीपक र अरुणले रेलवे ट्र्याकमा राखेको प्रेसरकुकर बम प्राविधिक त्रुटिका कारण नपड्केपछि आतंक मच्चाउने उनीहरूको योजना असफल भएको थियो । बम विस्फोट गराउन नसकेपछि दीपक र अरुणलाई पुस १३ गते बाराको जंगलमा बोलाएर बृजकिशोर गिरीले कलैयाका मोजाहिद्दिन अन्सारी र शम्भु भनिने लड्डुको सहयोगमा घाँटी रेटेर हत्या गरेको अनुसन्धानका क्रममा खुलेको प्रहरीले जनाएको छ ।
प्रतिक्रिया दिनुहोस !
