आर्मी सजिलै सेमिफाइनलमा
सिमराः विभागीय टोली त्रिभुवन आर्मी क्लब रुस्लान आठौं सिमरा गोल्डकप फुटबलको सेमिफाइनलमा प्रवेश गरेको छ । सिमरा रंगशालामा मंगलबार भएको अन्तिम क्वार्टरफाइनल खेलमा वीरगन्जलाई ३-० गोलले हराउँदै आर्मी अन्तिम चारमा पुगेको हो । उपाधिको दाबेदार मानिएको आर्मीको जितमा बालकृष्ण श्रेष्ठ, सन्तोष तामाङ र दीपक गुरुङले एकएक गोल गरे ।
प्रतियोगिताको सेमिफाइनल समीकरण पनि पूरा भएको छ । आर्मीसँगै साविक विजेता प्राइम पोलिक्लिनिक विजय युथ क्लब, सीएमजी संकटा क्लब र हिमालयन शेर्पा क्लब अन्तिम चारमा पुगेका छन् । आर्मीले फाइनल प्रवेशका लागि बिहीबार हिमालयन शेर्पासँग प्रतिस्पर्धा गर्नेछ । सहारा क्लबलाई पहिलो खेलमा हराउँदै अन्तिम आठमा प्रवेश गरेको वीरगन्जका खेलाडीबीच तालमेल नमिल्दा खेलमा आर्मी हावी भएको थियो । आक्रामक सुरुआत गरेको आर्मीले १६औं मिनेटमै अग्रता लिएको थियो ।
स्ट्राइकर नवयुग श्रेष्ठले मिलाएको पासलाई सदुपयोग गर्दै आर्मीका बालकृष्ण श्रेष्ठले बललाई जाली चुमाए । उनको प्रहार रोक्न वीरगन्जका गोलरक्षक राकेश गुरुङ असफल देखिए । आर्मीले पहिलो हाफमा थप केही गतिला अवसर सिर्जना ग¥यो । ३७औं मिनेटमा आर्मीका सन्तोष तामाङको फ्रिकिक बललाई वीरगन्जका पिटर सेगुनले गोल लाइनबाट हेड गर्दै बचाए ।
झापा—११ बाट मनाङ मस्र्याङ्दीविरुद्ध सोमबार झापा गोल्डकपको फाइनल खेलेका प्रवेश कटुवाल, पुजन उप्रेती, खामिर गिल्सान, सन्जोग राई र दिलन लोक्तानसहित मैदानमा उत्रिएको वीरगन्जले खेलमा नियन्त्रण गुमाएको थियो । वीरगन्जको तालमेल नमिल्दा बलियो देखिएको आर्मीले ४०औं मिनेटमा अर्को अवसर गुमायो । सन्तोष तामाङले मिलाएको पासलाई सदुपयोग गर्न टंक बस्नेत चुकेका थिए ।
आर्मीले पहिलो हाफको इन्जुरी समयमा दोस्रो गोल गर्यो । दुई मिनेटको इन्जुरी समयमा आर्मीका सन्तोष तामाङले गरेको उत्कृष्ट प्रहारले सीधै जाली चुम्यो । खेलमा सशक्त प्रदर्शन गरेका आर्मीका गोलरक्षक बिकेश कुथु गम्भीर घाइते भई मैदानबाट बाहिरिए । ५०औं मिनेटमा बल रोक्ने क्रममा जितेन्द्र कार्कीसँग ठोक्किँदा कुथुको टाउकोमा चोट लागेको हो । टाउकोमा पाँचवटा टाँका लागेका कुथुको स्थानीय अस्पतालमा उपचार भइरहेको छ । कुथु घाइते भएपछि सुनील श्रीवास्तव उनको स्थानमा आएका थिए ।
आर्मीले ५५औं मिनेटमा तेस्रो गोल थप्यो । बालकृष्ण श्रेष्ठको पासलाई सदुपयोग गर्दै दीपक गुरुङले टिमका लागि तेस्रो गोल गरे । ६३औं मिनेटमा आर्मीका भरत खवासले प्रहार गरेको बललाई वीरगन्जका राकेश गुरुङले बचाउने क्रममा रिबाउन्ड भएको बललाई नवयुग गोल गर्नबाट चुके । त्यसको १० मिनेटपछि आर्मीले अर्को सुनौलो मौका गुमायो । सन्तोष तामाङ वन भर्सेस वनको स्थितिमा गोल गर्नबाट चुके । उनको प्रहार वीरगन्जका गोलरक्षकले बचाउ गरे ।
यसैगरी ८७औं मिनेटमा वीरगन्जका पिटर सेगुनले गोल लाइनबाट सन्तोषको प्रहारलाई फर्काएका थिए । खेल सकिन केही मिनेट बाँकी रहँदा वीरगन्जले एउटा गोल फर्काउने अवसर चुकायो । निर्धारित समय सकिएपछि थपिएको इन्जुरी समयमा वीरगन्जका खामिर गिल्सानको प्रहार पोस्ट नजिकैबाट बाहिरिन पुग्दा आर्मीले सहज जित हात पार्यो ।
वीरगन्जका प्रशिक्षक सुलभजंग रानाले आर्मीविरुद्ध आफ्ना खेलाडीले खेल्न नसकेको प्रतिक्रिया दिए । आर्मीका प्रशिक्षक नवीन न्यौपानेले वीरगन्जका खेलाडीले सोचेजस्तो खेल्न नसक्दा सहज जित हात परेको बताए । उक्त खेलमा आर्मीका सन्तोष तामाङ म्यान अफ दी म्याच घोषित भए । उनले पाँच हजार रुपैयाँ पुरस्कार पाए । बुधबार विजय युथ क्लब र सीएमजी संकटा क्लबबीच खेल हुनेछ ।
प्रतिक्रिया दिनुहोस !
