संकटा फाइनलमा
सिमराः सीएमजी संकटा क्लब रुस्लान आठौं सिमरा गोल्डकपको फाइनलमा प्रवेश गरेको छ । सिमरा रंगशालामा बुधबार भएको पहिलो सेमिफाइनलमा संकटाले साबिक विजेता विजय युथ क्लबलाई २-१ गोलले हरायो । विजय युथले खेलको सुरुआतमै लिएको अग्रतालाई उल्टाउँदै संकटा उपाधि नजिक पुगेको हो ।
विजय युथले खेल सुरु भएको ४५ सेकेन्डमै सुरुआती गोल गरेको थियो । संकटाका रक्षापंक्ति सम्हालिन नपाउँदै विजय युथका विमल रानामगरले गोल गरेका थिए । सुमन बलले मिलाएको पासलाई उनले सदुपयोग गरेका थिए । संकटाका गोलरक्षक विनय श्रेष्ठले अगाडि बढेको मौकाको फाइदा उठाउँदै विमलले प्रहार गरेको बलले सीधै जाली चुम्न पुगेको थियो । संकटाले खेलको २७ औं मिनेटमा बराबरी गोल फर्कायो ।
डीबक्सभित्र पाएको बललाई सदुपयोग गर्दै संकटाका अनिल गुरुङलले खेल १-१ को स्थितिमा पुर्याए । गोलरक्षक अशोक बरालले अनिलको प्रहार रोक्न चुकेका थिए । खेल सकिन एक मिनेट बाँकी छँदा संकटाका विश्व अधिकारीले प्रहार गरेको कर्नर बलले सीधै जाली चुमेपछि विजय युथ हार खेप्न बाध्य बनेको थियो । उक्त प्रहार रोक्न विजय युथका गोलरक्षक अशोक बराल पूर्णरूपमा असफल देखिए । खेलका क्रममा घाइते भएका अशोक त्यसलगत्तै मैदानबाट बाहिरिएका थिए ।
अन्तिम समयमा गोल खाएपछि निकै तनावमा देखिएको विजय युथले इन्जुरी समयमा गोल फर्काउने राम्रो अवसर गुमाएको थियो । सुनिल बलले डीबक्स भित्र पाएको वन भर्सेस वनको स्थितिलाई सदुपयोग गर्न सकेनन् । खेलको म्यान अफ दी म्याच संकटाका विश्व अधिकारी घोषित भए । उनले पाँच हजार रुपैयाँ पुरस्कार पाए । विजय युथका प्रशिक्षक सुविन घिमिरले टिमले सम्हालिन नसक्नुनै पराजयको कारण भएको प्रतिक्रिया दिए ।
उत्कृष्ट प्रदर्शन गर्दै बनाएको अवसर सदुपयोग गर्न नसक्दा जित संकटलाई सुम्पनु परेको घिमिरले बताए । संकटाका प्रशिक्षक सल्यान खड्गीले जित हात पारे पनि खेलाडीले अझै सुधारिएर प्रदर्शन गर्न जरुरी रहेको बताए । खेलमा एक गोलले पछि परेपछि तालमेल केही गुम्न पुगे पनि सम्हालिएर खेलेको उनको भनाइ थियो । बिहीबार त्रिभुवन आर्मी क्लब र हिमालयन शेर्पाबीच प्रतिस्पर्धा हुनेछ ।
प्रतिक्रिया दिनुहोस !
