शेर्पालाई पन्छाउँदै आर्मी उपाधि नजिक
सिमराः हिमालयन शेर्पाविरुद्ध रोमाञ्चक जित हात पार्दै विभागीय टोली त्रिभुवन आर्मी क्लब आठौं सिमरा गोल्डकपको फाइनलमा प्रवेश गरेको छ । सिमरा रंगशालामा बिहीबार भएको खेलमा हिमालयन शेर्पालाई २-१ गोल अन्तरले पन्छाउँदै आर्मीले उपाधि भिडन्त सुरक्षित गरेको हो । आर्मीले उपाधिका लागि सीएमजी संकटासँग शनिबार प्रतिस्पर्धा गर्नेछ । साविक विजेता विजय युथ क्लबलाई पराजित गर्दै संकटाले यसअघि नै फाइनल सुरक्षित गरिसकेको छ ।
आर्मीको जितमा टंक बस्नेतले एक गोल गरे भने एक गोल शेर्पाका खेलाडीले आत्मघाती रूपमा उपहार दिए । हिमालयन शेर्पाका लागि हेमन गुरुङले गोल गरे पनि त्यो पर्याप्त हुन सकेन ।
निकै तालमेल देखाएको विभागीय टोलीका खेलाडीले शेर्पालाई सुरुआतदेखि नै दबाबमा राखेका थिए । आक्रामक सुरुआत गरेको आर्मीका कप्तान भरत खवासले खेलको सातौं मिनेटमै गोलको राम्रो अवसर पाए पनि त्यसलाई सदुपयोग गर्न सकेनन् । त्यसलगत्तै नवयुग श्रेष्ठले उत्कृष्ट अवसर गुमाए । शेर्पाका गोलरक्षक किशोर गिरी अगाडि बढेको अवस्थामा नवयुगले डिबक्सभित्रबाट प्रहार गरेको बल क्रसबारमाथिबाट बाहिरियो ।
आर्मीको दबाब लगातार झेलेको शेर्पाले खेलको २३औं मिनेटमा बनाएको अवसर सदुपयोग गर्न सकेन । शेर्पाका विश्वास श्रेष्ठले रिवाउन्ड बलमा फितलो प्रहार गरे । निकै रोमाञ्चक बनेको खेलमा आर्मीका नवयुग श्रेष्ठले खेलको ३३औं मिनेटमा प्रहार गरेको बल शेर्पाका गोलरक्षकले उत्कृष्ट बचाउ गरे । लगत्तै भरत खवासको प्रहारलाई पनि शेर्पाका गोलरक्षकले नियन्त्रणमा लिए । शेर्पाका गोलरक्षक किशोर गिरी झुक्किन पुग्दा आर्मीले ४३औं मिनेटमा अग्रता बनाउन सफल भयो ।
पहिलो हाफ पूर्ण रूपमा आफ्नो नियन्त्रणमा राखेको आर्मीविरुद्ध शेर्पाले इन्जुरी समयमा बराबरी गोल फर्काउँदै खेललाई थप रोमाञ्चक बनायो । चार मिनेट थपिएको इन्जुरी समय सकिन केही समय बाँकी रहेको अवस्थामा फ्रिकिकमार्फत हेमन गुरुङले गोल गरेका थिए ।
दोस्रो हाफमा पनि आर्मीले पुरानै लय देखायो । आर्मीले खेलको ५७औं मिनेटमा अग्रता लियो । आर्मीका टंक बस्नेतले उत्कृष्ट गोल गरे । टंकको गोलबाट अग्रता लिएको आर्मीले विपक्षी टिमलाई त्यसपछि कुनै अवसर दिएन र खेल आर्मीले २-१ गोल अन्तरले आफ्नो पक्षमा पार्यो ।
हिमालयन शेर्पाका प्रशिक्षक विकास मानन्धरले टिमको प्रदर्शन निकै कमजोर रहेको बताए । ‘विभागीय टोलीविरुद्ध हाम्रो फिटनेस कमजोर देखियो', मानन्धरले भने, ‘आर्मीले धेरै अवसर गुमाउँदा एक गोलको हार बेहोर्यौं ।
आर्मीका प्रशिक्षक नवीन न्यौपानेले खेल राम्रो भए पनि भरत र नवयुग नचल्दा संघर्ष गर्नु परेको बताए । खेलमा पाएको अवसर समयमै सदुपयोग गर्न नसक्दा राम्रो खेल खेल्दा पनि अन्तिम मिनेट कुर्नु परेको उनले बताए । ‘खेल पूर्ण रूपमा हाम्रो नियन्त्रणमा थियो तर स्कोर भने हुन सकेन', न्यौपानेले भने, ‘जसले गर्दा सहज जित हात पार्ने खेलमा संघर्ष गर्नु पर्यो ।'
प्रतिक्रिया दिनुहोस !
