कांग्रेस, एमाले, माओवादीले तिरेनन् उधारो खाएको रकम

भोजपुरः नेकपा एमाले भोजपुरले ०५४ सालको मध्यावधि चुनावयता सदरमुकामको चारभञ्ज्याङस्थित उर्मिला खुकुरी उद्योगबाट ७ हजार ८ सयको खुकुरी उधारोमा खरिद गरेको थियो ।

एमालेले जिल्लाको इतिहासमा ०१५ र ०६४ को निर्वाचनबाहेक सबै निर्वाचनमा एकछत्र कब्जा जमाउदै आएको छ । निर्वाचनमा पकडका हिसावले जिल्लामा पहिलो स्थानमा रहेको उसले दुई दशक बित्दा पनि खुकुरीको उधारो अझै चुक्ता गर्न सकेको छैन।

‘केहीबर्षसम्म उधारो पैसा मागेँ, पछाडि त आफैँलाई माग्न अठ्यारो लाग्यो, सम्झेर कुनै दिन देलान् कि१’ उद्योगका सञ्चालक हिरालाल श्रेष्ठले ठट्यौली पारामा भने । सांसद् कृपासुर शेर्पाले भने एमालेले पार्टी कार्यालयमा बोलाएरै सबै हिसाब बुझाएको बताए ।

०६४ को निर्वाचनका बेला तत्कालीन माओवादीले ब्राइट वे स्टोरेज एन्ड सप्लायर्समा पर्चा, पम्पलेट छपाइ, कम्प्युटरसम्बन्धी काम उधारोमा गरेको थियो । एक लाख बराबरको उधारो दशक बित्दा पनि नतिरेको सञ्चालक सफल सेन्चौरीले बताए । त्यहीबेला एउटा गतिलो प्रिन्टर समेत बिग्रिएको थियो। त्यसपछि समस्यामा पर्दै आएको ब्राइट वे एन्ड सप्लायर्सले गतिलो उन्नति गर्न सकेको छैन । हाल न्यु भोजपुरे खुकुरी उद्योगमा मर्ज गर्न बाध्य भएको सेन्चौरीले बताए । ‘उधारो लगेपछि बेला–बेला सम्झाए पनि ध्यान पुग्न सकेको छैन, ७ हजारजतिको खुकुरी पनि उधारो लगेका छन्,’ उनले भने।

चारभञ्ज्याङस्थित सजना किराना पसलले ०४६ सालको निर्वाचनदेखि ०६४ सम्म चामल, चिउरा, चाउचाउ, विस्कुट लगायतका खाद्यान्न प्रमुख दलका कार्यकर्तालाई उधारोमा बेचे । ‘लाखौँको उधारो लगेका छन्, हिसाबकिताब गर्दा एक दिनमा पनि सकिदैँन,’ सञ्चालक शिव श्रेष्ठले बताए । ‘दुईचार पटक मागियो, अब त माया मारिसकेँ, खातापाता सब नष्ट गरिसकेँ,’ उनले भने । उधारोले गर्दा खस्किएको पसल पहिलेकै अवस्थामा ल्याउन उनलाई हम्मे परेको थियो । ०७० देखि उधारो कारोबार गर्न छाडेको उनले बताए ।

०७० कै चुनावमा नेपाली कांग्रेसले बैँकरोडस्थित फाइन आर्टस्मा पर्चा, पम्पलेट, ब्याच छपाइ र खादाको हजारौँ रुपैयाँ तिरेको छैन । चुनावी प्रचारप्रसारका बेला अफसेटहरुमा लाखौँको उधारो बाँकी नै छ । जिल्ला पार्टीका प्रमुख र कार्यकर्ता तर्किएर हिँड्ने व्यवसायीको गुनासो छ ।

माओवादी नेताले भने चुनावी अभियानमा उधारो एक पैसा बाँकी नरहेको दाबी गरेका छन् । ‘कसैले उधारो रहेको भन्छ भने त्यो आरोपमात्र हो, एक पैसा उधारो छैन,’ नेकपा माओवादी केन्द्रका पोलिटब्युरो सदस्य एवम् पूर्व सभासद् सुदन किरातीले बताए । उनले ०६४ सालको चुनावमा भोजपुर क्षेत्र नं. २ बाट विजयी भएका थिए ।