पूरा भयो ‘चिलगाडी' सपना

सुर्खेतः निर्माण सुरु भएको ३० वर्षपछि कालीकोटको कोटबाडास्थित सुनथराली विमानस्थलमा पहिलोपटक जहाज अवतरण भएको छ । नेपालगन्जबाट चालक दलका सदस्यसहित १३ जना यात्रु लिएर उडेको तारा एयरको जहाज शनिबार बिहान सफल अवतरण भएको हो । योसँगै अब कालीकोटमा नियमित हवाईसेवा सञ्चालनका लागि बाटो खुलेको छ ।

३० वर्ष लगाएर निर्माण सम्पन्न भएको विमानस्थलमा पहिलोपटक शनिबार जहाज देखेका स्थानीय बासिन्दाको बर्सौंदेखिको जहाज (चिलगाडी) चढ्ने र कमसेकम हवाईमार्गद्वारा राजधानीसँग सम्पर्क बन्ने सपना पूरा हुने भएकोमा हर्षित छन् कालीकोटवासी ।

यसअघि आकाशमा मात्र उडेको देखेका अधिकांश स्थानीयले शनिबार आफ्नै आँगनमा जहाज देख्ने मौका पाए तब उनीहरूको खुसीको सीमा रहेन । खुसीयालीमा उनीहरूले कोटबाडामा अबिरजात्रा नै गरे ।

जिल्ला सदरमुकाम मान्मदेखि करिब पाँच घन्टाको पैदल दूरीमा रहेको विमानस्थलमा शनिबार जहाज हेर्नेको घुइँचो लाग्यो । सडक यातायातको पहुँच नपुगेको कोटबाडा आसपासका क्षेत्रबाट सयौंको संख्यामा मानिस जहाज हेर्न जम्मा भएका थिए । जहाज आउने जानकारी पाएपछि बिहानैदेखि फूलमालासहित विमानस्थल पुगेकी स्थानीय ८५ वर्षीया काल्चा विकले आफ्नो खुसी थाम्न सकिनन् ।

‘आजसम्म आकाशमा मात्र उडेको देखेकी थिएँ', उनले भनिन्, ‘हाम्रो आँगनमै आएर बस्ला भन्ने त सोचेकी पनि थिइनँ । बाँचेपछि सबै देख्न पाइँदो रहेछ । अब यो बुढेसकालमा चिलगाडी चढ्ने रहर पनि पूरा हुने भयो ।' अब छोरानातिलाई आवतजावतमा सजिलो हुने भन्दै उनले खुसी व्यक्त गरिन् । जहाज हेर्नकै लागि जिल्लाको लालु, माल्कोट, रुप्सा, कुमालगाउँ, कोटबाडा, रकु, मान्मलगायत बासिन्दा विमानस्थलमा जम्मा भएका थिए । जहाज अवतरण भएपछि उनीहरूले एकैसाथ ‘हुटिङ' एवं फूलमालाले स्वागत गरेका थिए ।

पदको शपथ लिएलगत्तै कर्णालीवासीसमेत रहेका पर्यटन तथा नागरिक उड्डयनमन्त्री जीवनबहादुर शाहीले आफ्नो कार्यकालमा उक्त विमानस्थल सञ्चालनमा ल्याउने घोषणा गरेका थिए ।

आफ्नै आँगनमा जहाज अवतरण भएपछि कोटबाडाका स्थानीयले शनिबार अबिरजात्रा नै गरे ।

शाहीको घोषणापछि विमानस्थलको निर्माण कार्यले तीव्रता पाएको थियो । केही साताअघि निर्माण सम्पन्न भएपछि मन्त्री शाहीले परीक्षण उडान गर्न निर्देशन दिएका थिए । यसअघि शाहीले आफैं तीनपटकसम्म निर्माणस्थलमा पुगेर काम सक्न निर्देशन दिएका थिए । परीक्षण उडान सफल भएसँगै अब नियमित उडान हुने नागरिक उड्डयन प्राधिकरणले जनाएको छ । कोटबाडामा अब नियमित उडान हुने प्राधिकरणका उपमहानिर्देशक राजकुमार क्षेत्रीले बताए ।

‘परीक्षण उडान सफल भएको छ', उनले भने, ‘अबदेखि यहाँ नियमित उडान हुनेछ । फागुनको पहिलो साता यसको औपचारिक उद्घाटन गर्नेछौं ।' यस्तै तारा एयरका क्याप्टेन सन्तोष शाहले कोटबाडामा विमान अवतरणका लागि भौगोलिक अवस्था उपयुक्त रहेको बताए ।

स्थानीय नागरिक समाजका अगुवा मीनबहादुर बोगटीले आफूहरूको जहाज चढ्ने सपना ढिलै भए पनि पूरा भएको प्रतिक्रिया दिए । जिल्लाका अधिकांश क्षेत्रमा अहिले पनि सडक नपुगेको भन्दै उनले हवाई सेवा सुरु भएपछि आफूहरूका सुखका दिन आएको बताए । तत्काल नियमित उडान सञ्चालन गर्न उनको आग्रह थियो । विमानस्थल निर्माणका क्रममा माटोको ढिस्कोमा पुरिँदा छोरा गुमाएकी स्थानीय रोजना बिष्टले भनिन्, ‘धेरै दुःख गरेर बनेको हो यो एयरपोर्ट ।

हामीले त छोरा नै गुमायौं । आँगनमै चिलगाडी देख्दा छोराको सम्झना आयो । ढिलै भए पनि चिलगाडी चढ्ने हाम्रो रहर पूरा हुने भयो ।'

विमानस्थलको कुल लम्बाइ करिब ६ सय ९० मिटर र ६० मिटर चौडाइ हुनेछ । तर तत्कालका लागि करिब पाँच सय ५० मिटर लम्बाइ र ४० मिटर चौडाइ रहेको जानकारी धावनमार्ग निर्माणको काम सकिएको निर्माणकार्यमा खटिएका इन्जिनियर रत्नबहादुर श्रेष्ठले दिए । परीक्षण उडान सफल भएपछि फागुन ११ गतेसम्मम औपचारिक उद्घाटन गरिने नागरिक उड्यन प्राधिकरणले जनाएको छ ।