एमालेले मैनालीलाई कारबाही गर्ने 

काठमाडौः कम्युनिस्ट नेता राधाकृष्ण मैनालीले हालै प्रकाशित पुस्तकमा आफ्नो बारेमा लेखेको कुरा झूटो भएको भन्दै वरिष्ठ नेता माधवकुमार नेपालले आपत्ति जनाएपछि एमालेले मैनालीलाई कारबाही गर्ने भएको छ ।

पार्टी मुख्यालय धुम्बाराहीमा बुधबार सुरु पोलिटब्युरो बैठकमा नेपालले पार्टीको केन्द्रीय सदस्यसमेत रहेका मैनालीले लेखेको पुस्तकमा उल्लिखित अंश झूटो, पूर्वाग्रह, बदनाम र तेजोवध गर्ने हिसाबले आएको भन्दै आपत्ति जनाएका थिए । मैनालीले हालै सार्वजनिक गरेको ‘नलेखिएको इतिहास' पुस्तकमा ०४६ सालको जनआन्दोलन उत्कर्षमा पुगेका बेला तत्कालीन मालेको केन्द्रीय समिति बैठकमा नेपालले भारतका सेनाको सहयोगमा नेपालमा गणतन्त्र स्थापना गर्ने प्रस्ताव गरेको उल्लेख छ ।

‘त्यसबेलाका केन्द्रीय समितिका कामरेडहरू यहाँ हुनुहुन्छ, अध्यक्ष कामरेड पनि यहाँ हुनुहुन्छ । ल तपाईंहरू नै भन्नुस्, त्यसबेला मैले त्यस्तो प्रस्ताव कहिले ल्याएको थिएँ ? ', नेपालको भनाइ उद्धृत गर्दै एक पोलिटब्युरो सदस्यले भने ।
त्यसपछि अध्यक्ष ओलीले जवाफमा मैनालीले पुस्तकमा उल्लेख गरेको माधव नेपालबारेको उक्त अंश झूट भएको र त्यस्तो कुनै प्रस्ताव नआएको भन्दै पार्टीले त्यसको औपचारिक खण्डन गर्ने र मैनालीलाई सचेत गराउने आश्वासन दिएका थिए । मैनाली ०५९ सालमा एमाले छाडेर तत्कालीन राजाको शाही कदमको समर्थनमा गएका थिए । उनी ०६१ मा ज्ञानेन्द्र शाहको सरकारमा मन्त्री भएका थिए । गणतन्त्र स्थापनापछि माओवादी प्रवेश गरेका मैनाली करिब एक वर्ष अघिमात्र एमालेमा फर्किएका थिए ।

बैठकले स्थानीय निर्वाचन जेठमा नभएमा अरू कुनै पनि निर्वाचन नहुने र देश संकटमा जाने निष्कर्ष निकालेको छ । बैठकमा बोल्दै एमाले अध्यक्ष केपी ओलीले यस्तो चेतावनी दिएको एमालेका एक नेताले बताए । ‘जेठमा स्थानीय तहको निर्वाचन नभए आगामी माघभित्र प्रदेश सभा र संघीय संसद्को पनि निर्वाचन हुँदैन, अनि देश ठूलो संकटमा धकेलिन्छ', अध्यक्ष ओलीको भनाइ उद्धृत गर्दै एक पोलिटब्युरो सदस्यले बताए ।

बैठकमा १० पृष्ठ लामो राजनीतिक प्रतिवेदन पेस गर्दै ओलीले तीनै तहको निर्वाचनका लागि अन्य दलसँग छलफल गरेर सरकारलाई दबाब दिन आवश्यक रहेको बताएका थिए । ‘संविधानले समेत निर्दिष्ट गरेबमोजिम २०७४ माघ ७ गते अगाडि नै जनप्रतिनिधिमूलक निकाय निर्वाचनको माध्यमबाट गठन गर्नु अनिवार्य छ, स्थानीय तह र केन्द्रीय तहका निर्वाचनका मिति अविलम्ब घोषणा गर्न त्यसका लागि कानुनी तथा राजनीतिक वातावरण निर्माण गर्नुपर्छ', ओलीले बैठकमा भने ।

मैनालीको पुस्तकमा उल्लिखित अंश झूट, पूर्वाग्रह, बदनाम र तेजोवध गर्ने हिसाबले आएको भन्दै माधव नेपालद्वारा आपत्ति ।

अध्यक्ष ओलीले बुधबार पेस गरेको राजनीतिक प्रतिवेदनमा सरकार परिवर्तनपछिका ६ महिना अवधि व्यर्थ सावित भएको उल्लेख छ । सरकार र सत्तरुढ दलको ध्यान निर्वाचनको तयारीमा नभई सत्ता लम्ब्याउने र विभिन्न शक्तिकेन्द्रलाई रिझाउने काममा केन्द्रित भएको उल्लेख छ ।

त्यसैगरी अहिलेको सरकारले बाह्य सम्बन्धमा पनि गम्भीर असन्तुलन पैदा गर्ने काम गरेको ओलीले आरोप लगाएका छन् । प्रतिवेदनमा राज्यका विभिन्न निकायमा जथाभावी राजनीतिक हस्ताक्षेप भएको, उच्च अदालका न्यायाधीश नियुक्तिमा सत्ता गठबन्धनको हस्तक्षेपकारी भूमिका भएको र पछिल्लो समय नेपाल प्रहरीभित्र पनि त्यस्तै भएको उल्लेख छ ।

बैठकमा फागुन २१ देखि सञ्चालन हुने मेची-महाकाली राष्ट्रिय अभियानसम्बन्धी कार्ययोजना, स्वतन्त्र विद्यार्थीको निर्वाचन र त्यसमा पार्टीको तर्फबाट खेल्नुपर्ने भूमिकाबारे छलफल भएको थियो ।