लुम्बिनी खुकुरीलाई सुपर लिग उपाधि
बुटवलः लुम्बिनी खुकुरी क्रिकेट क्लबले नेपाल टेलिकम रूपन्देही सुपर लिग क्रिकेट प्रतियोगिताको उपाधि जितेको छ । बुधबार भएको फाइनल खेलमा शिवशक्ति क्रिकेट क्लब भैरहवालाई ५५ रनले हराउँदै लुम्बिनी खुकुरीले उपाधि जितेको हो । उपाधि विजेता लुम्बिनी खुकुरीले नगद ५० हजार रुपैयाँ र ट्रफी हात पार्यो । उपविजेता शिवशक्तिले २५ हजार रुपैयाँमा चित्त बुझायो ।
स्थानीय सिद्धार्थ रंगशाला भैरहवामा टस जितेर ब्याटिङ रोजेको लुम्बिनी खुकुरीले निर्धारित ४० ओभरको खेलमा एक ओभर बाँकी छँदै सबै विकेट गुमाएर एक सय ४८ रनको योगफल तयार पार्यो । लुम्बिनीका कप्तान अन्तिम थापाले ४५, इकलाख अहमदले ३५, शंकर रानाले १४ र रोहित पौडेलले १३ रन बनाए । शिवशक्तिका विष्णु कटरिया र दुर्गेश कुर्मीले समान तीनतीन विकेट लिए । यस्तै, कृष्ण कार्की र अख्तर हुसेनले एक एक विकेट लिए ।
एक सय ४९ रनको विजयीलक्ष्य पछ्याएको शिवशक्तिले २७ ओभर तीन बलमा ९३ रनमात्र जोड्न सक्यो । शिवशक्तिका दुर्गेश कुर्मीले २३, दीपचन्द शर्माले २२ र कृष्ण कार्कीले १५ रन बनाए । शिवशक्तिलाई सस्तैमा समेट्न दुर्गेश गुप्ताले चार विकेट लिए । यस्तै साहद आलमले तीन, लालबहादुर अधिकारीले दुई र भीम सुनारले एक विकेट हात पारे ।
फाइनल खेलको म्यान अफ दी म्याच लुम्बिनी खुकुरीका दुर्गेश गुप्ता घोषित भए । त्यस्तै प्रतियोगिताको उत्कृष्ट खेलाडी वेस्टर्न क्रिक्रेट क्लब बुटवलका विक्रम भुसाल घोषित भए । उनले नगद ११ हजार प्राप्त गरे । उत्कृष्ट बलर र ब्याट्सम्यान भने लुम्बिनी खुकुरीका साहद आलम र अन्तिम थापा घोषित भए । उनीहरू दुवैले पाँचपाँच हजार नगद पुरस्कार प्राप्त गरे ।
विजेता तथा उपविजेता टोलीका खेलाडीलाई नेपाल टेलिकम पश्चिमाञ्चल क्षेत्रीय निर्देशनालयका निमित्त प्रमुख ललितकुमार दाहाल, रूपन्देही क्रिकेट संघका अध्यक्ष प्रशान्तविक्रम मल्ललगायतले पुरस्कार प्रदान गरे । प्रतियोगितामा १२ टोलीको सहभागिता रहेको थियो ।
प्रतिक्रिया दिनुहोस !
