काठमाडौः युरोप भ्रमणमा रहनुभएका परराष्ट्रमन्त्री डा. प्रकाश शरण महतले बिहीबार लक्जम्बर्गका प्रधानमन्त्रीसहित अन्य दुई मन्त्रीसंग भेटवार्ता गरेका छन् । मन्त्री डा.महतले लक्जम्बर्गका प्रधानमन्त्री ज्याभियर बेटेललाई लक्जम्बर्गले उपलब्ध गराउने अन्तर्राष्ट्रिय सहयोगको प्राथमिकता सूचीमा नेपाललाई पनि समावेश गर्न आग्रह गरे ।
सो आग्रहपछि प्रधानमन्त्री बेटेलले नयाँ दिल्लीमा रहेको लक्जम्बर्गको दूताबास र बेल्जियममा रहेको नेपाली दूताबासमार्फत यो प्रक्रिया अगाडि बढाउने र नेपाललाई पनि सहयोगको प्राथमिकताको सूचीमा राख्ने बारेमा पुनर्विचार गर्ने आवश्वासन दिएको मन्त्री महतका प्रेस संयोजक एकराज पाठकले बताए ।
हालसम्म लक्जम्बर्गले नेपाललाई युरोपियन युनियन र विभिन्न अन्तर्राष्ट्रिय सहयोग संस्थाहरुमार्फत विशेषगरी शिक्षा र स्वास्थ्यका क्षेत्रमा सहयोग पुर्याउदै आएको छ ।
मन्त्री डा महतले यस सहयोगका लागि विशेष धन्यवाद ज्ञापन गर्दै आगामी दिनमा पनि नेपाललाई विशेषगरी पूर्वाधार निर्माण, सीप विकास र पुननिर्माणका क्षेत्रमा थप सहयोगका लागि आग्रह गरे ।
प्रधानमन्त्री बेटेलले नेपाललाई दिइँदै आएको सहयोग निरन्तर रहने र थप सहयोगका क्षेत्रको विस्तारमा पनि आफूहरु सकारात्मक रहेको जानकारी दिए ।
मन्त्री डा.महतले आजै लक्जम्बर्गका विदेशमन्त्री जिन असलबर्न र अन्तर्राष्ट्रिय विकासमन्त्री रोमेन सिडरसँग पनि द्धिपक्षीय भेटवार्ता गरे ।
ती भेटहरुमा पनि मन्त्री डा.महतले नेपालमा लगानीको क्षेत्र विस्तारका साथै नेपालको बृहत्तर विकासमा सहयोगका लागि आग्रह गरे । मन्त्री डा.महत बिहीबार नै बेल्जियमबाट लक्जम्बर्ग पुगेका हुन् ।
प्रतिक्रिया दिनुहोस !
