काठमाडौः प्रधानमन्त्री पुष्पकमल दाहालले शुक्रबार निर्वाचन आयोगका प्रमुख आयुक्त अयोधीप्रसाद यादव र आयुक्तहरूसँगको भेटमा प्रजातन्त्र दिवसका अवसरमा शनिबार स्थानीय निर्वाचन मिति तोकिने बताएका छन् । ‘प्रधानमन्त्री दाहालले हामीसँगको भेटमा स्थानीय निर्वाचनको मिति शनिबारै तोकिने बताउनुभयो', प्रधानमन्त्रीको भनाई उद्धृत गर्दै आयोगका एक सदस्यले भने ।
जतिसक्दो छिटो स्थानीय निर्वाचनको मिति घोषणा गर्न आयोग पदाधिकारीले प्रधानमन्त्रीसमक्ष आग्रह गरेका थिए । आयोगका प्रमुख आयुक्त यादवले आगामी जेठ १ र २१ गतेको मिति प्रस्ताव गरे पनि प्रधानमन्त्रीले भने ‘साता-दस' दिनको फरकमा निर्वाचन गराउनुपर्ने धारणा राखेको बताइएको छ । प्रधानमन्त्री दाहालले आयोगका पदाधिकारीसँगको परामर्शमा मुलुकको सुरक्षा अवस्थालाई समेत दृष्टिगत गरी शनिबार नै स्थानीय निर्वाचनको मिति घोषणा गर्ने बताएको प्रधानमन्त्री सचिवालय स्रोतको भनाइ छ ।
प्रधानमन्त्री दाहालसँग शुक्रबार साँझ संघीय समाजवादी फोरम नेपालका अध्यक्ष उपेन्द्र यादवले समेत भेट गरेका छन् । उक्त भेटमा यादवले मोर्चासँगका तीनबुँदे सहमतिअनुसार संविधान संशोधनपछि मात्र निर्वाचन मिति तोक्न आग्रह गरेको प्रधानमन्त्री सचिवालय स्रोतले अन्नपूर्णलाई जानकारी दिएको छ । ‘संशोधन र निर्वाचन प्रक्रिया एकसाथ अघि बढाउने उद्देश्यका साथ मैले प्रजातन्त्र दिवसका दिन नै स्थानीय निर्वाचन मिति तोक्दैछु', प्रधानमन्त्रीको भनाइ उद्धृत गर्दै सचिवालय स्रोतले भन्यो । स्थानीय निर्वाचनमा मोर्चाको पूर्ण सहयोग, समथर्न रहनेमा आफू विश्वस्त रहेको धारणा प्रधानमन्त्रीले राखेका थिए ।
प्रतिक्रिया दिनुहोस !
