काठमाडौं : काठमाडौं प्रहरी परिसरले मातहतका वृत्तका प्रहरीलाई सुध्रिन निर्देशन दिएको छ । आफ्नो जिम्मेवारी राम्रोसँग वहन नगरेको गुनासो आएपछि परिसरले गम्भीर भएर काम गर्न आदेश दिएको हो ।
‘हामी निश्चित नीति र उद्देश्यद्वारा निर्देशित छौं । माथिल्लो निकायको निर्देशन र नीतिलाई हामीले अवलम्बन गर्नुपर्छ’, परिसर प्रमुख छविलाल जोशीले भने, ‘आफ्नो नीति र जिम्मेवारीभन्दा बाहिर गएर काम गर्नेलाई कडा कारबाही गर्छौं ।’
राजधानीका केही स्थानमा प्रहरी निकायले जिम्मेवारीपूर्वक काम नगरेको सूचना पाएका आधारमा जिल्ला प्रहरीले स्थलगत भ्रमणसमेत गरेको जोशीले जानकारी दिए । ‘यस विषयमा हेडक्वार्टरमा पनि कुरा भएको छ । माथिल्लो निकाय पनि गम्भीर छ’, जोशीले भने । जोशीले जिल्ला विकास समिति (जिविस) को अनुमतिबेगर प्लटिङ गर्ने, डोजर चलाउने र बालुवा झिक्नेलाई कडा कारबाही गर्न निर्देशन दिएको बताए ।
दुई डीएसपी र एक निरीक्षकलाई सचेत
काठमाडौं प्रहरी परिसरले मातहतका दुई प्रहरी नायब उपरीक्षक (डीएसपी) र एक निरीक्षकलाई सचेत गराएको छ । परिसरले काँडाघारी वृत्तका निरीक्षक मनोज श्रेष्ठ, स्वयम्भू वृत्तका डीएसपी कमल शाह र दरबारमार्ग वृत्तका डीएसपी कृष्णबहादुर पालीमगरलाई सचेत गराएको हो । काँडाघारीमा स्थानीय खोलाबाट बालुवा ओसारिरहेका तीनवटा ट्रक नियन्त्रणमा लिएपछि प्रहरीको बेवास्ता कमजोरी भएको निष्कर्ष निकाल्दै निरीक्षक श्रेष्ठलाई सचेत गराइएको हो ।
यसैगरी, स्वयम्भू क्षेत्रमा जुवा खेलिरहेका जुवाडेलाई बेवास्ता गरेको भन्दै डीएसपी शाहलाई र दरबारमार्ग क्षेत्रमा साताअघि दुई गुन्डा समूहबीच भएको झगडामा संलग्न सबैलाई पक्राउ गर्न नसकेको भन्दै डीएसपी मगरलाई सचेत गराइएको काठमाडौं प्रहरी परिसर स्रोतले जनाएको छ ।
प्रतिक्रिया दिनुहोस !
