काठमाडौं : राष्ट्रिय प्रजातन्त्र पार्टीको नयाँ नेतृत्वका लागि सोमबार निर्वाचन हुने भएको छ । निर्वाचन समितिले शनिबार प्रकाशन गरेको कार्यतालिकाअनुसार सोमबार बिहान ७ बजेदेखि मतदान हुनेछ ।
निर्वाचन कार्यक्रमअनुसार आइतबार उम्मेदवारले मनोनयन दर्ता गर्ने र सोमबार निर्वाचन हुनेछ । नयाँ विधानअनुसार महाधिवेशनले एक अध्यक्ष र १ सय ६१ केन्द्रीय सदस्य छान्नेछ । अध्यक्षका लागि हालसम्म पार्टी अध्यक्ष कमल थापा र राष्ट्रिय अध्यक्ष डा. प्रकाशचन्द्र लोहनीले उम्मेदवारी घोषणा गरेका छन् । अन्य थुप्रै नेताले केन्द्रीय सदस्यको उम्मेदवारी घोषणा गरेका छन् ।
यसअघि कमल थापालाई अध्यक्ष बनाउने भनी लोकेन्द्रबहादुर चन्द, लोहनी र पशुपतिशमशेर राणाले गरेको सहमति तोडिएको छ । डा. लोहनीले सहमति तोडेर अध्यक्षमा उम्मेदवारी दिने घोषणा गरेपछि निर्विरोधको सम्भावना कम भएको हो । यद्यपि, शीर्ष नेता सहमतिका लागि अन्तिम समयसम्म छलफलमा जुट्ने प्रवक्ता राजाराम श्रेष्ठले जानकारी दिए ।
यसैबीच, निर्वाचनका लागि मतपत्र प्रयोग गर्ने कि विद्युतीय मेसिन भन्नेमा विवाद भएको छ । निर्वाचन समितिले विद्युतीय मतदान प्रयोग गर्ने निर्णय गरेपछि लोहनी पक्षले आपत्ति जनाएको छ । राप्रपा नेपालको अघिल्लो महाधिवेशनमा इलेक्ट्रोनिक मेसिन प्रयोग गरेर अध्यक्ष थापाले अनुचित भोट ल्याई ठूलो मतान्तरले अर्का प्रत्यासी पद्मसुन्दर लावतीलाई हराएको भन्दै लोहनी पक्षले असन्तुष्टि जनाएको हो ।
एकीकृत राप्रपाको महाधिवेशनमा मतदानका लागि प्रयोग गर्न लागिएको इलेक्ट्रोनिक भोटिङ मेसिनमा घुसपैठ भएको आरोप उसले लगाएको छ । सफ्टवेयरबाट चल्ने मेसिनमा घुसपैठ भएको भन्दै शनिबार बन्दसत्रमा केहीबेर होहल्लासमेत भएको थियो । बन्दसत्रमा डा. लोहनीले जबर्जस्ती विद्युतीय मेसिन प्रयोग गरिए निर्वाचनसमेत बहिष्कार गर्ने चेतावनी दिएको एक नेताले बताए । प्रवक्ता श्रेष्ठले भने निर्वाचन समितिले विद्युतीय मतदान प्रयोग गर्ने निर्णय भएको जानकारी दिए ।
शनिबारको बन्दसत्रमा अध्यक्ष कमल थापाले पेस गरेको राजनीतिक प्रतिवेदन, राष्ट्रिय अध्यक्ष डा. प्रकाशचन्द्र लोहनीले पेस गरेको आर्थिक प्रतिवेदन र बुद्धिमान तामाङले पेस गरेको विधान संशोधन प्रस्तावमाथि छलफल भएको थियो ।
प्रतिक्रिया दिनुहोस !
