वन कार्यालयको जमिन व्यक्तिको नाममा

चन्द्रपुरः इलाका वन कार्यालय नुनथर रहेको वनक्षेत्र तथा भवन रहेको जमिन व्यक्तिको नाममा दर्ता भए पनि वन कार्यालयले उक्त जमिन खारेजीका लागि चासो नदेखाएको पाइएको छ । सुकुमबासी समस्या समाधान आयोगले वन कार्यालय भएको जमिन व्यक्तिको नाममा दर्ता गरिदिएको हो । रौतहटको चन्द्रपुर नगरपालिका ९ मा रहेको नुनथर इलाका वन कार्यालय भवनवरपरको पूर्वपश्चिम राजमार्गसँग जोडिएको करिब दुई बिगाहा जमिन आयोगले व्यक्तिको नाममा दर्ता रहेको पाइएको हो ।

२०५५ सालमा सुकुमबासी समस्या समाधान आयोगका जिल्ला अध्यक्ष गम्भीरा निरालाले इलाका वन कार्यालय रहेको वनक्षेत्रको जमिन ४१ जना व्यक्तिको नाम दर्ता गरिदिएका थिए । वनक्षेत्रको जमिनमा २०५० सालमा जिल्ला वन कार्यालय रौतहटले नुनथर रेन्जपोस्टको भवन निर्माण गरेर कार्यालय सञ्चालन गरेको थियो ।

कार्यालय स्थापना भएको पाँच वर्षपछि आयोगले करोडौं मूल्य पर्ने राजमार्गछेउको जमिन व्यक्तिको नाममा दर्ता गरेको पाइएको हो । उक्त जमिन ४१ जनाको नाममा १० देखि १८ धुरसम्म कित्ताकाट गरी वितरण भएको पाइएको छ । उक्त जमिनका इलाका वन कार्यालय, दर्जनौं रुख र सो वनक्षेत्रबाट संकलन गरिएको काठदाउरा घाटगद्दी गर्ने गरिएको थियो ।

२०५५ सालमा सुकुमबासी समस्या समाधान आयोगका जिल्ला अध्यक्ष गम्भीरा निरालाले वनक्षेत्रको जमिन ४१ जना व्यक्तिको नाम दर्ता गरिदिएका थिए ।

वनक्षेत्रको जमिन भए पनि केही वर्षदेखि आफ्नो नामको जमिन भन्दै व्यक्तिहरू लालपुर्जा लिएर आउन थालेपछि मंगलपुरका स्थानीय आश्चर्यमा परेका छन् । पौराइ मंगलपुरका स्थानीयले वनक्षेत्रको सार्वजनिक जमिन व्यक्तिको नामबाट खारेज गर्न माग गर्दै गतवर्ष नै जिल्ला वन कार्यालयसँग माग गरे पनि सुनवाइ नभएको उनीहरूको गुनासो छ ।

व्यक्तिको नाममा जमिन दर्ता रहेको जानकारीपछि एक वर्ष अघिदेखि उक्त जमिनको विषयमा पुर्जाधनी र स्थानीयबीच विवाद हुँदै आएको छ । सुकुमबासी आयोगले जग्गाधनी पुर्जा हस्तान्तरण गरेकाले आफूहरूले उक्त जमिन भोगचलन गर्न पाउनुपर्ने पुर्जाधनी हुनेहरूको माग छ ।

सुकुमबासी समस्या समाधान आयोग रौतहटले वन कार्यालय भएको क्षेत्रको जमिन व्यक्तिको नाममा दर्ता गरेको विषयमा कुनै लिखित जानकारी नआएको जिल्ला वन कार्यालय रौतहटले जनाएको छ । उक्त जमिनका विषयमा अनुसन्धान गर्ने कार्यालयका डीएफओ दीर्घनारायण कोइरालाले जनाएका छन् ।