मिलापत्रमा टुङ्गिन्छन् महिला हिंसाका मुद्वा

महोत्तरीः जिल्ला प्रहरी कार्यालय अन्तर्गतको महिला तथा बालबालिका सेवा केन्द्रमा सन् २०१६ मा दर्ता भएका घरेलु तथा महिला हिंसाका अधिकांश मुद्दाहरूमा मिलापत्र भएका छन् । सन् १०१६ मा केन्द्रमा दर्ता भएका घरेलु हिंसाका ३०४ ओटा उजुरीमध्ये १७६ ओटामा मिलापत्र भएको जिल्ला प्रहरी कार्यालयले जनाएको छ ।

एक वर्षको अवधिमा परेका उजुरीमध्ये १२० ओटा छिनोफानो हुन बाँकी छ । सन् २०१६ मा घरेलु हिंसा/महिला हिंसाका कारण पीडित भएको भन्दै ३०४ जना महिलाहरूले जिल्ला प्रहरी कार्यालय अन्तर्गतको महिला तथा बालबालिका सेवा केन्द्र मा ३०४ वटा उजुरी दर्ता गराए ।

जसमध्ये कुटपिट, मार्ने धम्की, खाना लाउन नदिएको र घरनिकाला गरिएका २६३ जना, विवाह दर्ता तथा नागरिकता नबनाई दिएको २९, अर्को श्रीमती ल्याएर हेला गरेकोमा ५ , बोक्सीको आरोप लगाएको घटनामा ० जना पीडित भएका थिए । ती घटनामध्ये प्रहरीले १७६ घटनामा मिलापत्र गराएको र १२० छिनोफानो हुन बाकी रहेको केन्द्रका इन्चार्ज खिलकुमारी राउतले जनाए ।

घरेलु हिंसासम्बन्धी उजुरीहरूमा आरोपितले खानलाउन दिने, नागरिकता, विवाह दर्ता बनाइ दिने र कुटपिट नगर्ने भनेपछि पीडित मिल्न राजी हुने हुँदा अधिकांश मुद्दाहरू मिलापत्र हुने गरेका छन् । मिल्ने अवस्थासम्म सहमति गराउने भएकाले मुद्दाका पीडित र आरोपितलाई राखी उनीहरूको समस्याको बारेमा छलफल तथा सहजीकरण गर्ने गरेको केन्द्रका इन्चार्ज राउतले बताइन् ।

निवेदकहरूले प्रहरी कार्यालयमा उजुरी दिएपछि गाउँ, घरपरिवारमा मिल्न दबाव सृजना भई सहमतिको सम्भावना बढ्ने गरेको प्रहरीको भनाई छ ।