पसल र टहरा डोजर लगाएर भत्काइयो

वीरगन्जः वीरगन्जको घण्टाघर चोक नजिकैको विपी उद्यानमा रहेको तरकारी, फलफुल तथा माछा मासु बजार आइतबार वीरगन्ज उपमहानगरपालिका कार्यालयले हटाएको छ । उपमहानगरपालिका कार्यालयले नेपाल प्रहरी र सशस्त्र प्रहरी परिचलान गरेर डोजरको सहयोगमा तरकारी बजारमा रहेका करिब पाच सय पसल, टहरा र घरहरु आइतबार बिहान भत्काएको हो ।

बिहान पाँच बजे नै सुरक्षाकर्मीसहित पुगेको उपमहानगरपालिका कार्यालयको डोजरले बजारमा रहेका थोक तथा खुद्रा पसलका टहरा र घर भत्काएको हो । डोजरले बजारका पसल र टहरा हटाउने क्रममा स्थानीय व्यापारी र प्रहरीबीच सामान्य झडप पनि भएको थियो । स्थिती नियन्त्रणमा लिन प्रहरीले लाठी चार्जसमेत गरेको थियो ।

प्रहरीको बलमा उपमहानगरपालिका कार्यालयले डोजर लगाएर पसल र टहरा भत्काएपछि आक्रोशित बनेका व्यपारीले सडकमा तरकारी र फलफुल फालेर विरोध जनाएका थिए । उपमहानगरपालिका कार्यालयले बिना सुचना आइतबार बिहान झिसमिसेमै प्रहरीको आडमा डोजर लगाएर पसल र टहरा भत्काएको व्यपारीको आरोप छ । उनीहरुले उपमहानगरपालिका र प्रहरीको दमनविरुद्ध आन्दोलनमा उत्रिने चेतावनी पनि दिएका छन् ।

वीरगन्ज तरकारी तथा फलफुल व्यवसायी संघका अध्यक्ष विदुर गुप्ताले आज दिउँसो जिल्ला प्रशासन कार्यालयमा पुगेर प्रमुख जिल्ला अधिकारीलाई १२ घण्टाको अल्टिमेटम दिने र तरकारी तथा फलफुल व्यवसायीका लागि उचित व्यवस्थापन नगरिए भोलि बिहान देखि वीरगन्जका सम्पुर्ण बजार र पसल बन्द गर्ने चेतावनी दिए ।

व्यपारी र पसले आफ्नो घरमै सुतेका बेला प्रहरी र नगर प्रहरीले बिहान चार बजे नै गुण्डागर्दी शैलीमा पसल भत्काएको र करौडौंको क्षति भएको जानकारी दिए । वीरगन्जको मीना बजारमा व्यवस्थित मिना कम्पलेक्स बनाउने क्रममा उपमहानगरपालिका कार्यालयले त्यहा रहेका तरकारी, फलफुल र माछामासु पसल २०६७ सालमा घण्टाघर स्थित विपी उद्यान परिसरमा सारेको थियो । त्यस बेला स्थानीय प्रशासनको पहलमा भएको व्यपारी र उपमहानगरपालिका कार्यालय बिचको वार्तामा मिना कम्पलेक्सको निर्माण सम्पन्न भएपछि कम्पलेक्समा तरकारी, फलफुल र माछामासु पसलहरु सार्ने सहमति भएको थियो ।

तर उपमहानगरपालिका कार्यालयले मिना कम्पलेक्स ठेक्कामा लगाएपछि तरकारी र तथा फुल व्यवसायी संघले मीना कम्प्लेक्सको ठेक्का खारेजीको माग गर्दै पर्सा जिल्ला अदालतमा मुद्धा हालेको थियो । गत फागुन ३ गते पर्सा जिल्ला अदालतले संघको विपक्षमा फैसला गरेपछि वीरगन्ज उपमहानगरपालिका कार्यालयले फागुन ४ गते सुचना जारी गरेर ४८ घण्टा भित्र पसल र टहरा हटाउन व्यपारीसंग आग्रह गरेको थियो ।

सूना जारी गरेको ४८ घण्टा भित्र व्यपारीले पसल र टहरा नहाटएपछि आइतकार बिहान डोजर लगार हटाइएको वीरगन्ज उपमहानगरपालिका कार्यालयका सूचना अधिकृत प्रकाशमान अमात्यले बताए । उनले मिना कम्पलेक्समा पसल सार्न व्यपारीलनई पटक पटक आग्रह गर्दा पनि नमानेको र अदालतले पनि संघको विपक्षमा फैसला गरेपछि आइतबार पसलका टहरा र घर भत्काइएको बताए ।

घण्टाघर चोक नजिकैको विपी उद्यान परिसरमा तरकारी, फलफुल तथा माछामासुका करिब एक हजार पसल सञ्चालनमा रहेका थिए । तरकारी तथा फलफुल व्यवसायीलाइ वीरगन्जको रेल्वे रोडमा रहेको ३० कठ्ठा सार्वजनिक जग्गामा सार्ने योजना पनि रहेको भन्दै उपमहानगरपालिका कार्यालयका सूचना अधिकारी अमात्यले रेल्वे रोडको जग्गामा पर्खाल लगाउने र माटो पुर्ने कामका लागि छिटटै ठेक्का लगाउने तयारीमा रहेको बताए ।

मिना कम्प्लेक्समा सबै व्यपारी नअट्ने भएकाले विकल्पको रुपमा उपमहानगरपालिका कार्यालयले रेल्वे रोडको जग्गामा पनि तरकारी तथा फलफुल बजारको लागि व्यवस्था गर्न लागेको अमात्यले बताए ।