काठमाडौः नेपाल क्रिकेट संघ (क्यान) माथि लागेको निलम्बनको सम्बन्धमा आगामी जुनमा बस्ने अन्तर्राष्ट्रिय क्रिकेट काउन्सिल (आईसीसी) को वार्षिक साधारणसभाले छलफल गर्ने भएको छ । आईसीसीले सोमबार विज्ञप्तिमार्फत नेपाली क्रिकेटको विषय वार्षिक साधारणसभामा छलफलका लागि राखिने जनाएको हो ।
तर, त्यसअघि सल्लाहकार समूहले क्यानको विधान परिमार्जन गरी बुझाई सक्नुपर्ने आईसीसीले जनाएको छ । सल्लाहकार समूहले बुझाएको क्यानको परिमार्जित विधानलाई अर्को महिना विश्व क्रिकेट लिग च्याम्पियनसिपअन्तर्गत केन्या र नेपालबीच कीर्तिपुरमा हुने खेलको दौरान आईसीसीको टोलीले अध्ययन गरी विधान लागू हुने मिति र त्यसअनुसार हुने क्यानको नयाँ निर्वाचनको मिति पनि तय गर्नेछ ।
आईसीसीले क्यानमाथिको प्रतिबन्ध हटाउने सम्बन्धमा सल्लाहकार समूह गठन गरी विधान बनाउने काम गरिरहेको छ ।
नेपाल र केन्याबीच आगामी मार्च ११ र १३ मा दुई खेल हुँदै छ । आईसीसीले जनाएअनुसार सल्लाहकार समूहले आफ्नो काम समयमै पूरा गरेको अवस्थामा आगामी जुनपछि क्यानमाथि प्रतिबन्ध हट्न सक्नेछ । क्यान गत अप्रिलदेखि आईसीसीको निलम्बनमा छ । आईसीसीले क्यानमाथि सरकारी हस्तक्षेप भएको तथा स्वतन्त्र र स्वच्छ निर्वाचन हुन नसकेको भन्दै आईसीसीले क्यानको सदस्यता निलम्बनमा राख्ने निर्णय गरेको थियो ।
सोही समयबाट क्यानलाई दिँदै आएको आर्थिक सहयोगसमेत रोकेको आईसीसीले नेपाली टोलीलाई अन्तर्राष्ट्रिय प्रतियोगितामा सहभागिताको अवसर भने दिने निर्णय गरेको थियो । त्यसयता आईसीसीले क्यानमाथिको प्रतिबन्ध हटाउने सम्बन्धमा सल्लाहकार समूह गठन गरी विधान बनाउने काम गरिरहेको छ ।
आईसीसीका हेड अफ ग्लोबल डेभलपमेन्ट विलियम ग्लेनराइटले नेपाल आई शनिबार र आइतबार सल्लाहकार समूहका सदस्यहरूसँग गरेको छलफलपछि जारी विज्ञप्तिमा नेपाली क्रिकेटलाई पुनः आईसीसीको सदस्य बनाउने बारेमा सकारात्मक छलफल भएको जनाइएको छ । ग्लेनराइट नेपालबाट फर्किसकेका छन् ।
प्रतिक्रिया दिनुहोस !
