बहिरा विद्यार्थीले जिते ‘राष्ट्रपति कप’

बागलुङ: नेपाली समाजमा बहिराहरू भन्नेबित्तिकै अझै पनि फरक तरिकाले हेर्ने प्रचलन छ । उनीहरूको अन्तर्निहित योग्यता, क्षमता, प्रतिभा र खेल कौशललाई आशाभन्दा बढी आशंका र कमजोर हिसाबले लिने गरिन्छ । तर, बागलुङ जिल्लामा आयोजित छैटौं जिल्लाव्यापी राष्ट्रपति रनिङ सिल्ड प्रतियोगिताको उपाधि बहिरा बिद्यार्थीले जितेर सनसनी मच्चाएका छन् ।

जिल्लाका तीन निर्वाचन क्षेत्रबाट छनोट भएर आएका ६६ विद्यालयका एक हजार दुई सयभन्दा बढी विद्यार्थीबीचको प्रतिस्पर्धामा आफ्ना प्रतिस्पर्धीलाई उछिन्दै धौलागिरि बहिरा आवासीय विद्यालयले उपाधि जित्न सफल भएको हो । बुधबार सम्पन्न प्रतियोगितामा पाँच स्वर्णसहित एक सय १५ अंक प्राप्त गरेर धौलागिरि बहिरा विद्यालयले उपाधि चुमेको जानकारी जिल्ला खेलकुद विकास समितिका कार्यालयसचिव भीमसेन शाक्यले दिए ।

उपाधिसँगै बहिरा विद्यालयले ५५ हजार पाँच सय ५५ रुपैयाँ पुरस्कार प्राप्त गरेको छ । उपाधि विजेताले युवा तथा खेलकुद मन्त्रालयबाट समेत पुरस्कारस्वरूप ५० हजार रुपैयाँ प्राप्त गर्नेछ । उपाधि जितेपछि धौलागिरि बहिरा आवासीय विद्यालयका प्रधानाध्यापक मधुसूदन न्युरेले सांकेतिक भाषामा भने, ‘जिल्लाभरको प्रतिस्पर्धामा बहिरा विद्यार्थीको जितले बहिरालाई हेर्ने दृष्टिकोण र व्यवहारमा केही परिवर्तन ल्याउनेछ, यसले महŒवपूर्ण सन्देश दिन सफल भएको छ ।’

प्रतियोगितामा एक सय १२ अकंसहित सदरमुकामस्थित कालिका कन्या माध्यमिक विद्यालय दोस्रो भयो भने बलेवा नारायणस्थानको जनताधन मावि ९५ अकंसहित तेस्रो भयो । दोस्रो र तेस्रो हुने विद्यालयले क्रमशः ३३ हजार तीन सय ३३ र २२ हजार दुई सय २२ रुपैयाँ पुरस्कार प्राप्त गरे । प्रतियोगितामा विजयी विद्यार्थीलाई बागलुङ नगरपालिकाका कार्यकारी अधिकृत रमेश ढकाल, जिल्ला शिक्षा कार्यालय बागलुङका शाखा अधिकृत लोकनाथ आचार्य र जिल्ला खेलकुद विकास समिति बागलुङका अध्यक्ष धनबहादुर परियारले पुरस्कार वितरण गरेका थिए ।

जिल्लाबाट छनोट भएका खेलाडीहरूले अब पश्चिमाञ्चल क्षेत्रीयस्तरको छनोट खेलमा सहभागिता जनाउने जानकारी जिल्ला खेलकुद विकास समिति बागलुङका अध्यक्ष परियारले दिए ।