‘क्रिकेटमा टसको महत्व छैन’ 

पुने: टस प्रथाको अन्त्य गर्नुपर्ने पक्षमा वकालत गर्दै आएका अस्ट्रेलियन क्रिकेट टोलीका प्रशिक्षक ड्यारेन लेहम्यानले भारतविरुद्धको टेस्ट शृंखलामा टसले कुनै असर नपार्ने बताएका छन् । बिहीबारदेखि पुनेमा सुरु हुन लागेको भारत र अस्ट्रेलियाबीचको पहिलो टेस्टको पूर्वसन्ध्यामा प्रशिक्षक लेहम्यानले शृंखलामा टेस्टले कुनै असर नपार्ने बताएका हुन् ।

भारत भ्रमणमा रहेको अस्ट्रेलियाले चार टेस्ट खेल्ने कार्यक्रम छ । पहिलो टेस्ट फेब्रुअरी २३ देखि २७ तारिखसम्म पुनेमा हुनेछ भने दोस्रो टेस्ट मार्च ४ देखि ८ सम्म बेंलोरमा, तेस्रो टेस्ट मार्च १६ देखि २० सम्म राँचीमा र चौथो टेस्ट मार्च २५ देखि २९ तारिखसम्म धर्मशालामा आयोजना हुनेछ ।‘पछिल्लो पटक हामी भारत आउँदा चारपटक टस जितेका थियौं र चारै खेल हारेर शृंखला ४–० ले गुमाएका थियौं । त्यसैले टस जितेरमात्र हुँदैन, टस जितेपछि राम्रो पनि खेल्नुपर्छ’, लेहम्यानले भने ।

लेहम्यानले टसको विषयलाई लिएर यसअघि पनि टिप्पणी गर्दै आएका छन् । उनले टस नगरी पाहुना टोलीले ब्याटिङ गर्ने कि फिल्डिङ त्यसको निर्णय गर्न पाउनुपर्ने अडान राख्दै आएका छन् । ‘टसका बारेमा मैले स्पष्ट रूपमै भनिसकेको छु कि यो प्रथालाई अन्त्य हुनुपर्छ । चाहे भारतमा होस् या अस्ट्रेलिया, मैले टसको सदैव विरोध गर्दै आएको छु’, लेहम्यानले भारतीय सञ्चार माध्यमसँगको कुराकानीमा भनेका छन् ।

लेहम्यानले टस नगरी पाहुना टोलीलाई ब्याटिङ अथवा फिल्डिङको अधिकार दिँदा शक्ति सन्तुलन हुने दाबी गरेका छन् । घरेलु टोलीले आफू अनुकूल पिच तयार गर्ने भएकाले ब्याटिङ वा फिल्डिङको अधिकार पाहुना टोलीलाई दिँदा शक्ति सन्तुलन हुने लेहम्यानको विश्वास छ । अस्ट्रेलियाका प्रशिक्षक लेहम्यानले मात्र होइन, अस्ट्रेलियाकै पूर्वकप्तान रिकी पोन्टिङ र शेन वार्नले पनि टसको विकल्प खोजिनु पर्ने बताउँदै आएका छन् । यसैगरी इङ्ल्यान्डका केभिन पिटर्सन र इयान बोथमले पनि खुलेरै टस प्रथाको अन्त्यको पक्षमा आवाज उठाउँदै आएका छन् ।