हलिउडमा उदाउँदै अमृता
नेपाली युवतीका लागि हलिउड सपना केवल कल्पनामात्रै हुन सक्छ । तर नेपालमा जन्मिएकी अमृता आचार्यले हलिउडमा आफूलाई चिनाउन सफल भएकी छन् । नाम, दाम अनि कामका लागि कहलिएको हलिउडलाई लक्ष्य बनाउनेहरूको संख्या संसारमा कमी छैन । तर नेपाली रजतपटमा क्रियाशील अभिनेता अभिनेत्रीले भने त्यो सपना देख्दा पनि देख्दैन । देखेका पनि छैनन् । तर अमृता कसरी हलिउडमा चिनिन पुगिन् त ?
नेपाली बाबु प्राडा गणेश आचार्य र युक्रेनी आमा आर्किटेक्ट लारिसा आचार्यको सन्तानको रूपमा जन्मिएकी अमृता ६ वर्षको उमेरमै अभिभावकका साथमा बेलायत गएकी थिइन् । बेलायत गएको केही समयपछि आचार्य परिवार नर्वेमा बसाइ सरेको थियो । विभिन्न मुलुकमा हुर्कने अवसर पाएकाले अमृता युक्रेनियन, रुसी, नर्वेजियन, अंग्रेजीलगायतका भाषा राम्रो बोल्छिन् । नेपाली समाज र संस्कृतिलाई पनि उनले बिर्सेकी छैनन् ।
नर्वेबाट विद्यालय शिक्षा पूरा गरेपछि आफ्नोे रुचिको क्षेत्र अभिनयमा करियर बनाउन उनी पुनः बेलायत लागिन् । लन्डनस्थित एकेडेमी अफ लाइभ एन्ड रेकडेर्ड आर्ट्स (एएलआरए) बाट नाटक अभिनय कलामा स्नातक गरिन् । अमृताले आफ्नो अभिनयको सुरुवाती दिनमा केही नाटक र स्टेज शोमा पनि काम गरी अनुभव सँगालेकी छन् ।
२६ वर्षीया अमृता हिजोआज बेलायती टेलिभिजन आईटीभीको मेडिकल ड्रामा ‘द गुड कर्म हस्पिटल’का कारण चर्चामा छिन् । बेलायती र भारतीय चिकित्सकहरूको सेरोफेरोमा बनेको उक्त सिरियलमा उनले डा. रुवि वाकरका रूपमा मुख्य भूमिकामा अभिनय गरेकी छन् । फेब्रुअरी ५ बाट सुरु भएको यो सिरियल मार्च १२ सम्म प्रसारण हुनेछ । सीमित स्रोतसाधनमा काम गर्नुपर्ने भारतीय अस्पताल, त्यहाँको काम अनि जीवन र मायाको यथार्थसँग जुधिरहेकी डाक्टरको कथालाई यस सिरियलमा देखाउन खोजिएको छ ।
२६ वर्षीया अमृता आचार्य हिजोआज बेलायती टेलिभिजन आईटीभीको मेडिकल ड्रामा ‘द गुड कर्म हस्पिटल’का कारण चर्चामा छिन् । सन् २०१३ मा आक्समेन डटकमले सार्वजनिक गरेको संसारका सबैभन्दा आकर्षक ९९ महिलाको सूचीमा अमृता आचार्य पनि परेकी थिइन् ।
अमेरिकी टेलिभिजन एचबीओले प्रसारण गरेको सिरियल ‘गेम अफ थ्रोन्स’मा अमृताले अभिनय गरेको एकजना रानीकी सुसारे इर्रको भूमिकालाई पनि धेरै दर्शकले मन पराएका थिए । त्यस्तै सन् २०११ मा बीबीसीको ल्यापल्यान्ड शोमासमेत काम गरेकी उनले ‘द डेभिल्स डबल’नामक जीवनीमा आधारित चलचित्रमा विद्यालय पढ्ने छात्राको भूमिका निर्वाह गरेकी छन् । त्यस्तै नर्वेली चलचित्र ‘आई एम योर्स’ नामक नर्वेली चलचित्रमा पनि उनले अभिनय गरिन् । सो चलचित्र सन् २०१३ मा ओस्कारमा मनोनयनमा परेको थियो ।
अमृता अभिनीत अर्को नर्वेली चलचित्र ‘डेड स्नो २’ अमेरिकी सुनडान्स फिल्म फेस्टिभलमा प्रदर्शन गरिएको थियो । सन २०१३ मा आक्समेन डटकमले सार्वजनिक गरेको संसारका सबैभन्दा आकर्षक ९९ महिलाको सूचीमा अमृता पनि परेकी थिइन् । बेलायती रोमान्टिक कमेडी अमर, अकबर र टोनीमा समेत अभिनय गरेकी अमृताको प्रतिभा र कामको प्रशंसा गदै केही दिनअघि बेलायती पत्रिका द सन्ले उनको बारेमा फिचर लेखेको थियो ।
प्रतिभाशाली अभिनेत्रीका रूपमा उदाएकी अमृता अभिनयमा जति दक्खल राख्छिन् सामाजिक कार्यमा पनि उनको त्यत्तिकै रुचि छ । २०७२ साल वैशाखमा नेपालमा गएको विनाशकारी भूकम्पमा परी क्षति भएका विद्यालयलाई सहयोग गर्न उनले लन्डनमा आयोजित म्याराथनमा सहभागी भई रकम संकलनसमेत गरेकी थिइन् । (एजेन्सीको सहयोगमा)
प्रतिक्रिया दिनुहोस !
