रोनी म्यानचेस्टर युनाइटेडमै रहने
लन्डन: इङ्लिस प्रिमियर लिग क्लब म्यानचेस्टर युनाइटेडका कप्तान वेन रोनीले तत्काल क्लब नछाड्ने भएका छन् । रोनीले क्लब छाड्ने व्यापक चर्चा चलेपछि उनले कम्तीमा यो सिजन म्यान युनाइटेडमै रहने घोषणा गरेका हुन् ।
पछिल्लो समय रोनी चीनको सुपर लिग क्लबमा आबद्ध हुने चर्चा चलेको थियो । उनले क्लब छाड्ने चर्चा व्यापक बनेपछि म्यान युनाइटेडका प्रशिक्षक जोसे मोउरिन्होले पनि केही दिनअघि रोनीको विषयमा आफूले केही बताउन नसक्ने स्पष्टीकरण दिनु परेको थियो । रोनीले यो सिजन आफ्नो एकमात्र लक्ष्य म्यान युनाइटेडका लागि उत्कृष्ट प्रदर्शन गर्नु रहेको बताएका छन् ।
‘क्लबका लागि यो महत्वपूर्ण समय हो, त्यसैले यति बेला मेरो एकमात्र उद्देश्य म्यानचेस्टर युनाइटेडलाई एकपछि अर्को सफलता दिलाउनु नै हो’, उनले भनेका छन् । इङ्लिस प्रिमियर लिगमा यो सिजन गतिलो प्रदर्शन गर्न नसकिरहेको म्यान युनाइटेड तालिकाको छैटौं स्थानमा छ । २५ खेल खेलेको म्यान युनाइटेडले ४८ अंकमात्र जोड्न सकेको छ । तालिकाको पहिलो स्थानमा आसीन चेल्सीको समान खेलबाट ६० र दोस्रो स्थानमा रहेको म्यानचेस्टर सिटीको समान खेलबाट ५२ अंक छ ।
म्यान युनाइटेडसँग रोनीको सम्झौता अझै १८ महिना बाँकी छ । ३१ वर्षीय सन् २००४ देखि नियमित रूपमा म्यान युनाइटेडमा आबद्ध छन् । ‘अन्य केही क्लबले पनि मलाई भित्राउने इच्छा व्यक्त गरेका छन्, त्यसका लागि म उनीहरूलाई धन्यवाद दिन चाहन्छु तर, कम्तीमा यो सिजन म म्यानचेस्टर युनाइटेडमै रहनेछु’, रोनीले भनेका छन् ।
यो सिजन म्यान युनाइटेडले आगामी आइतबार साउथ ह्याम्पटनसँग इङ्लिस लिग कपको फाइनल खेल्ने कार्यक्रम छ । यसैगरी म्यान युनाइटेड युरोपा लिगको प्रिक्वार्टरफाइनलमा पनि पुगेको छ । म्यान युनाइटेड एफए कपको पनि क्वार्टरफाइनलमा पुगेको छ ।
प्रतिक्रिया दिनुहोस !
