सहिदगन्ज बन्यो अमननगर

विराटनगरः मोरङ डायनिया-९ को सहिदगञ्जको नाम फेरिएर अमननगर अर्थात शान्ति टोल भएको छ । गत असारमा आएको बाढीले वस्ती नै बगाएपछि सहिदगञ्ज निकै अशान्त भएको थियो ।

विपन्न मुस्लिम समुदायको बाहुल्य रहेको यो टोलमा धेरै घरका भग्नावशेष मात्र थिए । गाउँकै अस्तित्व संकटमा परेर गाउँलेको बिल्लिबाठ लागेको थियो । तर, दुःखका दिन धेरै रहेनन् यही टोलमा नयाँ घर बनाएर विपन्न परिवारलाई हस्तान्तरण गरिएपछि गाउँमा फेरि खुसीयाली छाएको छ । पुनःनिर्माण भएपछि गाउँमा अमनचयन कायम भएको भन्दै गाउँलेकै सल्लाहमा टोलको नाम ‘अमननगर' बनाइको छ । उर्दूमा अमन अर्थात शान्ति ।

कुवेतका नागरिकको सहयोगमा बीस परिवारलाई घर, मदरसा, मस्जिद र दुहुनो गाईसमेत हस्तान्तरण गरेका छन् । करिब ८० लाख रुपैयाँको लागतमा गाउँ पुनःनिर्माण गरिएको गाविस सचिव विनोद घिमिरेले जानकारी दिएका छन् । उनले भने,‘दाताले विपन्न सुकुम्बासीलाई पक्की चरसहित सेन्टर बेराले बारिएको दुई कोठाको घर बनाई दिएका छन् ।'

मोहम्मद अब्दुल आइतबार आफ्नै घरमा कुवेतबाट आएका अतिथिले रिवन काट्दा निकै हर्षित थिए । ९ जना परिवार सदस्यसहित साँघुरो ठाउँमा जसोतसो बस्दै आएका थिए । दुई कोठे सेन्टर बेरासहितको नयाँ घर पाएपछि अब्दुलले भने,‘अब छोराछोरीलाई जाडोमा न्यानो गरी सुताउन र बर्खामा ओत लगाउने ठाउँ पाएको छु । निकै खुसी लागेको छ ।' उनले नयाँ घरहरु बनेपछि आफ्नो टोलको मुहार नै फेरिएको बताए ।

मोहम्मद रफीका ११ जना सन्तान छन् । बाढीले घर बगाएपछि त्रिपालको बास भयो । लालाबालालाई जोगाउन निकै कठिन पनि तयो । तर, दाताले घर बनाएर चाहिने भाँडावर्तन र लत्ताकपडासमेत सहयोग गरेकोले निकै सजिलो भएको बताउँदै भने,‘अब टोलको अनुहार नै फेरिएको छ म जस्तो टोलका धेरै मानिसले नयाँ घर पाएका छन् ।'

नेपाल डेभलपमेन्ट सोसाइटीको पहलमा कुवेतको रहमा इन्टरनेशनलले सहिदगञ्जमा सहयोग गर्न सहमति जनाएको थियो । गाउँमा महिलालाई सिलाई मेसिन र गाई पनि सहयोग स्वरुप उपलब्ध गराइएको छ । रहमाका प्रतिनिधि तरिक सइदले भने,‘विपन्न मुस्लिम समुदायलाई सहयोग पुगोस भनेर नै हामी नेपालसम्म आएका हौं । यो सानो सहयोगले विपन्नको अनुहारमा ठूलो खुसीभाव देखेका छौं ।' उनले नेपालीका लागि आफूहरु सँधै सहयोग गर्न तयार रहेको पनि बताए ।

वस्तीमा मस्जिद, दुई कोठे पक्की मदरसा र विपन्न सुकुम्वासीको घर निर्माणका लागि डायनिया गाविसले ७ कठ्ठा जग्गा उपलब्ध गराएको हो । यो टोलमा एक सय ५० परिवार बसेपनि अरुको घरलाई बाढीले क्षति नगरेकोले बीस परिवारलाई घर बनाइएको हो ।