भक्तपुर : आयोजक सैनिक आवासीय महाविद्यालयले भक्तपुरमा भएको दसौं प्रधानसेनापति कप अन्तरविद्यालय रनिङ शिल्ड टी ट्वेन्टी क्रिकेट प्रतियोगिताको च्याम्पियन भएको छ ।
प्रतियोगिताअन्तर्गत बुधबार भएको फाइनलमा ललितपुरको डीएभी सुशील केडिया स्कुललाई ५३ रनले हराउँदै जीत निकालेको हो । प्रतियोगिताको साविक विजेता सैनिक उपाधिसँगै २५ हजार रुपैयाँ नगद पुरस्कारसमेत जोगाएको छ । उपविजेता डीएभीले भने १५ हजार रुपैयाँमै चित्त बुझाउनुपरेको छ ।
सैनिकले प्रतियोगिताको दोस्रो संस्करणदेखि दसौंसम्म लगातार नौपटक उपाधि जित्न सफल भएको छ ।
बुधबार टस जितेर व्याटिङ राजेको सैनिक निर्धारित २० ओभरमा ६ विकेटको क्षतिमा डीएभीसामु एकसय २१ रनको लक्ष्य प्रस्तुत गरेको थियो । सैनिकका भविन मगरले अविजित रहँदै सर्वाधिक २८ रन जोडे । १६ बलको सामना गरेका उनले चार चौका प्रहार गरे ।
त्यस्तैै अशीम मल्लले तीन चौकाको मद्दतमा २७ र जेम्स केसीले दुई चौकासहित २३ रनको योगदान दिए । बलिङतर्फ डीएभीका समन श्रेष्ठले १८ रन दिएर दुई विकेट हात पोर । त्यस्तै आशीष शाह र सुजल गुप्ताले एकएक विकेट लिए ।
जवाफी व्याटिङ गर्न आएको डीएभी एक विकेट छँदै बल सकिँदा ६७ रनमै समेटिन बाध्य भएको थियो । डीएभीका लागि सुजल गुप्ताले दुई चौकाको मद्दतमा २० र आदित्य अग्रवालले एक चौका हानेर नौ रन जोडे ।
बलिङतर्फ सैनिकका दीपक न्यौपाने एक्लैले डीएभीका चार विकेट हात पारे । फाइनल खेलका म्यान अफ दि म्याच बन्न सफल न्यौपानेले चार ओभर बलिङ गर्दा जम्मा ११ रनमात्रै खर्चे ।
त्यस्तै सैनिकका प्रफुल्ल श्रेष्ठ र आयुष अधिकारीले दुईदुई हात पारे । फाइनलमा आयोजक सैनिकलाई उपाधि जिताउन महत्वपूर्ण भूमिका खेलेका कप्तान प्रफुल्ल प्रतियोगिताकै उत्कृष्ट फिल्डर बन्न सफल भए । त्यस्तै सैनिकका दीपक न्यौपाने उत्कृष्ट बल बन्दा उपविजेता डीएभीका सुजल गुप्ता प्रतियोगिताकै उत्कृष्ट खेलाडी घोषित भए ।
त्यस्तै सैनिकका प्रसिद्ध बस्याल उत्कृष्ट व्याट्सम्यान र जेम्मसका विराट आचार्य उत्कृष्ट विकेट किपर बन्न सफल भए । प्रतियोगिताका विजेता, उपविजेता , व्यक्तिगत विधातर्फ उत्कृष्ट हुन सफल खेलाडीहरुलाई नेपाली सेनाका प्रधानसेनापति राजेन्द्र क्षेत्रीले शिल्ड, पदक, प्रमाणसहित नगद पुरस्कार वितरण गरेका छन् ।
प्रतियोगितामा काभ्रेसहित काठमाडौं उपत्यकाका १५ वटा स्कुलको सहभागिता रहेको थियो ।
उपधि जितेपछि खुसीयाली मनाउँदै सैनिक आवासीय महाविद्यालयका खेलाडी तथा अफिसियल । तस्बिर ः ईश्वरकाजी खाइजू
प्रतिक्रिया दिनुहोस !
