२० वर्षे तीन हजार गाडी हटे
काठमाडौः यातायात व्यवस्था विभागले २० वर्ष पुराना भाडाका गाडी सञ्चालनमा रोक लगाएसँगै पहिलो दिन बुधबार तीन हजार बढी गाडी हटेको जनाएको छ । बिहानैदेखि अनुगमनमा निस्किएको विभाग र ट्राफिक प्रहरीको टोलीले पुराना गाडी सडकमा गुडेको पाएन ।
दिनभरको अनुगमनमा रत्नपार्कमा २० वर्ष पुराना एउटा ट्याक्सी मात्र फेला परेको विभागका सूचना अधिकारी टोकराज पाण्डेले बताए । भेटिएका केही थोत्रा सवारीलाई नियन्त्रणमा लिएर जरिवाना गरेको र दैनिक रूपमा अनुगमनलाई निरन्तरता दिने उनले बताए ।
उपत्यकाका सबैभन्दा बढी लगनखेलदेखि छुट्ने गाडी विस्थापित भएको विभागको भनाइ छ । अनुगमन टोलीले बसपार्क र यसअन्तर्गतका रुटमा पुराना गाडी नभेटेकाले यस रुटबाट लुभु छुट्ने १७, चापागाउँ ४० वटा बस हटेको पाण्डेले बताए ।
राजपत्रमा सूचना प्रकाशन गरी ०७३ फागुन १७ गतेबाट २० वर्ष पूरा भएको गाडीलाई सञ्चालन गर्न नपाउने भनिएकाले व्यवसायीको विरोध र आक्रोशले निर्णय फिर्ता हुन नसक्ने विभागको भनाइ छ । यता, थप व्यवस्थापनका लागि राज्यले सवारी तथा यातायात व्यवस्था ऐन २०४९, र सवारी तथा यातायात व्यवस्था नियमावली २०५४, राजपत्रमा प्रकाशन गरी जारी गरिसकेको छ ।
व्यवसायीको विरोध र आक्रोशले निर्णय फिर्ता हुन नसक्ने विभागको भनाइ
उसले क्रमशः निजी, सरकारी २० वर्ष पुराना गाडी हटाउने तयारी गरेको छ । यसका लागि राजपत्रमा प्रकाशित सूचनामा सार्वजनिक सवारीसाधन मालवाहक र यात्रुवाहक सवारी साधनको दर्ता र नवीकरणको चरणमै २० वर्ष आयु तोकिसकेको छ ।
सवारी परीक्षण कार्यालय टेकुले अब बाँकी यातायातका साधनलाई नियमित प्रदूषण जाँच गर्नेछ । विभागले ०७१ साल साउनमै केन्द्र स्थापना सवारी परीक्षण सुरु गर्ने भने पनि मेसिन चालु अवस्थामा नभएकाले समस्या भएको थियो ।
०७३ साल माघ ४ गते सवारी परीक्षण गर्ने केन्द्रले विभागबाट अधिकार पाएकाले अब १५ मिनेटमा सवारीसाधन प्रदूषण मापन गरी प्रतिवेदन दिने तयारीमा जुटेको कार्यालय प्रमुख रामचन्द्र पौडेलले बताए । विभागको तथ्यांकमा नेपालमा हाल २३ लाख ५० हजार सवारीसाधन दर्ता छन् ।
प्रतिक्रिया दिनुहोस !
