सुन पक्राउ प्रकरणःसम्पत्ति छानबिन गर्न सुझाव

काठमाडाैंः केन्द्रीय अनुसन्धान ब्युरो (सीआईबी) ले सुन प्रकरणको अनुसन्धान प्रतिवेदन सरकारी वकिललाई बिहीबार बुझाएको छ । सीआईबीले साढे ३३ किलो सुनसहित गत पुस २१ गते त्रिभुवन विमानस्थलबाट तीनजना भरियालाई पक्राउ गरेको थियो । अनुसन्धानका क्रममा विमानस्थलमा कार्यरत वरिष्ठ प्रहरी उपरीक्षक (एसएसपी) श्याम खत्री, भन्सारी विभागका अधिकारी र व्यवसायी गरी थप नौजना पक्राउ परेका थिए । प्रहरीले उनीहरूविरुद्ध संगठित अपराधमा मुद्दा दर्ता गरेको थियो ।

सुनका मुख्य मालिक मानिएका हरिशरण केसी र रोशन भुसाललगायत अझै पनि फरार छन् ।

सीआईबी स्रोतका अनुसार अनुसन्धान प्रतिवेदनमा डेढ दर्जनभन्दा बढीलाई फरार सूचीमा राखिएको छ जसमा सुनका मुख्य मालिक मानिएका हरिशरण केसी, रोशन भुसाललगायत फरार रहेको जनाइएको छ । फरारको सूचीमा व्यवसायी र अन्य मालिकको पनि नाम छ । सीआईबीले अभियुक्तविरुद्ध भन्सार छली र संगठित अपराधलाई जोडेर मुद्दा पेस गर्न सरकारी वकिललाई सुझावस्वरूप मागदाबी गरेको छ ।

पक्राउ परेका सरकारी कर्मचारीको हकमा अख्तियार दुरुपयोग अनुसन्धान अयोगलाई उनीहरूको सम्पत्ति छानबिन गर्न सुझाइएको छ । सरकारी वकिलबाहेकको हकमा उनीहरूको सम्पत्ति छानबिन गर्न सम्पत्ति शुद्धीकरण आयोगलाई सुझाव दिइएको छ । ‘पक्राउ परेकाको सम्पत्ति छानबिन गर्न सके उनीहरूले कति अकुत सम्पत्ति कमाएका छन् भन्ने थाहा हुन्छ । यसका लागि अख्यितार दुरुपयोग अनुसन्धान आयोग र सम्पत्ति शुद्धीकरणको भूमिका महत्ववपूर्ण हुन्छ', सीआईबीले स्रोतले भन्यो ।

दुबईबाट खरिद गरेको सुन विमानस्थलका प्रहरी र भन्सार कर्मचारीको मिलोमतोमा त्रिभुवन विमानस्थलबाट बाहिरिएपछि उक्त सुन ‘एजेन्ट' र अन्य पार्टनरमार्फत व्यवसायीसम्म पुग्ने गथ्र्यो । सुन व्यवसायीले नेपाली बजारमा राष्ट्र बैंकमार्फत प्राप्त हुने सुन अपुग हुने बताउँदै आएको अवस्थामा विभिन्न समयमा तस्करमार्फत आएको सुन बरामद हुने गरेको छ । यसमा सरकारी कर्मचारीको मिलोमतो हुने गरेको देखिएको छ । यसपटक सीआईबीले एसएसपी खत्रीसहित विमानस्थल भन्सारका अधिकारी श्रीनारायण यादव र राज ढकाललाई पनि पक्राउ गरेको थियो ।