तिलाेत्तमा गाेल्डकपः टाइब्रेकरमा आर्मी भाग्यमानी

बुटवलः गोलरक्षक सुशील श्रीवास्तव चम्किएपछि विभागीय टोली त्रिभुवन आर्मी क्लब बुटवलमा जारी १९औं तिलोत्तमा गोल्डकपको फाइनलमा प्रवेश गरेको छ । निकै प्रतिस्पर्धात्मक खेलमा बिहीबार आर्मीले टाइब्रेकरमा आयोजक टोली अग्नि रूपन्देही-११ लाई ४-२ गोलले हरायो । अघिल्लो संस्करणको फाइनलमा रूपन्देहीसँग पराजय भोगेको आर्मीले यसपटक सेमिफाइनलमै बदला लियो ।

निर्धारित समयमा दुवै टोलीले गोलरहित बराबरी खेलेका थिए । अतिरिक्त समयको एक सय १०औं मिनेटसम्म दुवै टोलीले बराबरी खेलेपछि खेलको निर्णय टाइब्रेकरबाट गरिएको थियो । गेम चेन्जरको रूपमा दुई विदेशी खेलाडीलाई मैदान पठाएको रूपन्देही कुनै चमत्कार देखाउन सकेन । टाइब्रेकरमा एकएक बल बाँकी छँदा आर्मीले जित सुनिश्चित गर्दै उपाधि नजिक पुगेको हो ।

रूपन्देहीका सौरव मगर र उत्तम गुरुङले मात्रै बलको सदुपयोग गरे । अफ्रिकी खेलाडी एमबोला र सामसनको प्रहार विफल बनेको थियो । एमवोलाको बल बाहिरिएको थियो । सामसनको बल आर्मीका गोल रक्षक सुशीलले फर्काएका थिए ।

आर्मीका हिरण्य मगर, राजु तामाङ, विवेक बस्नेत, सन्तोष तामाङले गोल गरेका थिए । त्यसअघि आर्मीले एक दर्जन गोल गर्ने सुनौला अवसर गुमाएको थियो । खेलको ५९औ मिनेटमा आर्मीले खालि पोस्टमा गोल गर्ने अवसरसमेत गुमाएको थियो । उत्तम गुरुङको प्रहार क्रस रूपन्देहीका गोल रक्षक दिलीप क्षेत्रीको हातबाट फुत्किँदा पाएको अवसर आर्मीले सदुपयोग गर्न सकेन् । लगत्तै भएको खालि पोस्टमा पनि आर्मीका खेलाडीले बल प्रहार गर्न सकेनन् । लगातार पोस्ट आक्रमण गरेको आर्मीले एक सय तीन मिनेटको सुन्दर अवसर गुमाएको थियो ।

करिब २५ सय घरेलु दर्शकको साथ पाएको रूपन्देहीले पनि सुनौला अवसरलाई सदुपयोग गर्न सकेन । ६१औं मिनेटमा लक्ष्मण रुचालले गरेको प्रयास पोस्ट नजिकैबाट बाहिरिँदा समर्थक स्तब्ध बनेका थिए । ७३औं मिनेटमा सामसनले पाएको राम्रो अवसर आर्मीका रक्षापंक्तिका खेलाडीले असफल पारिदिए । रूपन्देहीले एक सय मिनेटमा डीबक्स नजिकैबाट पाएको फ्रिकिकको मौका आर्मीका रक्षकले विफल पारिदिएका थिए । आर्मीका गोल रक्षक सुशील म्यान अफ दी म्याच बने । फाइनलमा आर्मीले संकटा क्लबसँग शनिबार प्रतिस्पर्धा गर्नेछ । प्रतियोगिताको विजेताले पाँच लाख ५५ हजार पाँच सय ५५ र उपविजेताले नगद तीन लाख ३३ हजार तीन सय ३३ रुपैयाँ प्राप्त गर्नेछन् ।