एम्मा आकर्षण

हलिउडमा ‘हाइयस्ट पेड' नायिकाका रूपमा स्थापित एम्मा स्टोनको आकर्षण बढ्दो छ । २८ वर्षीया स्टोन अभिनयमा जति सफल छिन् गायनमा पनि त्यत्तिकै दक्खल राख्छिन् । हलिउड सेलिब्रेटीको विशेषता भन्नु रोमान्स, बिन्दास जीवनशैली, प्रेम, सेक्स आदि मानिन्छ । यी विषयमा पनि एम्माको चर्चा नहुने होइन तर उनी काम र सफलताबाटै बढी चर्चित बन्न सफल भएकी छन् ।

अमेरिकाको एरिजोनामा सन् १९८८ मा जन्मेकी उनी अहिले क्यालिफोर्नियास्थित लस एन्जलसमा बस्छिन् । हलिउडमा सफलताको मानक बनेकी उनको वास्तविक नाम इमिली जिन स्टोन हो । उनी सर्वाधिक बढी अवार्ड पाउने नायिकामध्येमा पर्छिन् । अहिलेसम्म एक सय चार पटक विभिन्न अवार्डमा मनोनयनमा परेकी उनले ओस्कार, ब्रिटिस एकेडेमी फिल्म, गोल्डेन ग्लोब, बाफ्टा, एमटीभी मुभीलगायत ३४ वटा प्रतिष्ठित अवार्ड हात पारिसकेकी छन ।

विश्व चलचित्रमा सबैभन्दा ठूलो र कौतुहलपूर्ण मानिने ओस्कार अवार्डको ८९औं संस्करणमा उनले डेमियन चाजेलले निर्देशन गरेको चलचित्र ‘ला ला ल्यान्ड'बाट एम्माले सर्वोत्कृष्ट नायिकाको अर्वाड चुमिन् । ओस्कारको यस संस्करणमा एम्मा अभिनीत यो चलचित्र १४ विधामा मनोनयनमा परेको थियो । जसमा सर्वोत्कृष्ट निर्देशक, अभिनेत्री, छायांकार, स्कोर, गीत र प्रोडक्सन डिजाइन गरी ६ विधामा अवार्ड हात पार्न सफल भयो ।

आफ्ना समकालीनमध्ये हलिउडमा प्रभावशाली नायिका मानिने एम्मालाई सन् २०१३ मा फोब्र्स म्यागेजिनले विश्वप्रसिद्ध सय सेलिब्रेटीमध्येमा समावेश गरेको थियो । सन् २००० देखि रंगमञ्चमा काम गर्न थालेकी उनी किशोरावस्थामै आमासँग लस एन्जलस आएकी हुन् । ‘न्यु प्याट्रिज फ्याम्ली' नामक रियालिटी शोमार्फत टेलिभिजनमा प्रवेश गरेकी उनले सुरुमा टेलिभिजनमा ससाना भूमिका निर्वाह गर्थिन् । सन् २००७ मा चलचित्र सुपरब्याडबाट हलिउड डेब्यु गरेकी हुन् ।

एम्मालाई चर्चामा ल्याउने चलचित्र भने सन २००९ मा बनेको ‘जोम्बिल्यान्ड' हो । एम्माले मुख्य भूमिका निर्वाह गरेको पहिलो चलचित्र भने ‘इजी ए' हो । हास्यप्रधान यो चलचित्र सन् २०१० मा दर्शकमाझ आएको थियो । यस चलचित्रबाट उनले सर्वोत्कृष्ट नायिकाका रूपमा बाफ्टा अवार्ड र गोल्डेन ग्लोब अवार्ड हात पारेकी थिइन् । त्यसपछि सुरु भएको सफलताको शृंखला झन्झन् तेज गतिमा अघि बढिरहेको छ ।

सन् २०११ मा उनको अर्को चलचित्र ‘क्रेजी, स्टुपिड, लभ' र ‘द हेल्प'ले समीक्षकको ध्यान तान्यो । सन् २०१२ मा स्पाइडर म्यानमा ‘ग्वेन स्टाकी' खेलेपछि उनले त्यस चलचित्रबाट पनि वाहवाही पाइन् । सन् २०१४ मा हास्यप्रधान चलचित्र ‘बर्डम्यान'बाट ‘एकेडेमी अवार्ड' पाएकी उनले सन् २०१६ मा दर्शकमाझ आएको सांगीतिक चलचित्र ‘ला ला ल्यान्ड'बाट बाफ्टा, गोल्डेन ग्लोब अवार्डसहित ओस्कार जितेकी हुन् ।