खोप रोक्ने कर्मचारीलाई ‘हदैसम्म कारबाही'
काठमाडौः स्वास्थ्य मन्त्रालयले १५ जिल्लाका ५ वर्षमुनिका बालबालिकाका लागि खुवाउन सुरु गरेको पोलियो खोप कार्यक्रममा अवरोध पुर्याउने कर्मचारीलाई कडा कारबाही गर्ने जनाएको छ ।
मन्त्रालयले तराईका १२ र काठमाडौं उपत्यकाका ३ गरी १५ जिल्लामा शनिबार र आइतबार पोलियो खोप अभियान चलाएको छ । तर सिनियर अहेवहरूले हेल्थपोस्ट इन्चार्ज बनाउन माग गर्दै स्वास्थ्य चौकीमा तालाबन्दी गरेपछि शनिबार कार्यक्रम अवरुद्ध भएको छ । कैलाली, बर्दिया, बाँके, कपिलवस्तु, पर्सा, बारा, रौतहट, धनुषा, महोत्तरी, सप्तरी, सिराहा, सुनसरी, काठमाडौं, भक्तपुर र ललितपुरमा पोलियो थोपा खुवाउने कार्यक्रम रहेकोमा केही जिल्लामा अवरुद्ध भएको मन्त्रालयले जनाएको छ ।
स्वास्थ्य मन्त्रालयका प्रवक्ता डा. भोगेन्द्रराज डोटेलले खोप अवरुद्ध पार्ने कर्मचारी पहिचान गरी निलम्बन गरेर हदैसम्म कारबाही अगाडि बढाउने बताए । अवरोधका कारण शनिबार पोलियो खुवाउन नसकिएका जिल्लामा आइतबार खुवाइने जानकारी उनले दिए ।
सिनियर अहेवहरूले हेल्थपोस्ट इन्चार्ज बनाउन माग गर्दै स्वास्थ्य चौकीमा तालाबन्दी गरेपछि शनिबार कार्यक्रम अवरुद्ध भएको छ ।
खोप बालबालिकाको नैसर्गिक अधिकार र स्वास्थ्यकर्मीको अभिभारा भएकाले केही स्वार्थका कारण लाखौं बालबालिकाको अधिकार हनन गर्न नमिल्ने मन्त्रालयको भनाइ छ । बालबालिकाको भविष्यमाथि खेलबाड गरेर ठूलो भूल गरेको भन्दै कर्मचारीलाई कारबाही गर्ने तयारीमा जुटेको मन्त्रालयले जनायो । सरकारले सन् २०१५ मा नेपालमा पोलियो रोग उन्मूलन भएको घोषणा गरेको छ भने सन् २०१९ भित्र पोलियो निर्मूल गर्ने लक्ष्य लिएको छ । १५ जिल्लाका करिब १६ लाख बालबालिकालाई पोलियो थोपा खुवाउने कार्यक्रम तय गरेको मन्त्रालयले जनायो ।
आन्दोलनरत स्वास्थ्यकर्मीले पोलियो खोपलाई प्रभावित गर्न खोपका सरसामान ओसारपसारमा अवरोधदेखि तालाबन्दीसम्म गरेको मन्त्रालयको भनाइ छ । जनआन्दोलन सफल भएपछि तत्कालीन सरकारले करिब ३ हजार ९ सय अहेवको दुई तह बढुवा गरेको थियो । तर लोकतान्त्रिक बढुवा खाए पनि शैक्षिक योग्यता नपुगेका कारण जिम्मेवारी नपाएको भन्दै उनीहरूले आन्दोलन सुरु गरेका छन् ।
यता स्वास्थ्यमन्त्री गगन थापाले दरबन्दी सिर्जना गर्ने प्रस्ताव मन्त्रिपरिषदबाट स्वीकृत भएको र स्वास्थ्य सेवा ऐन संशोधन गरी तीन महिनाभित्र समस्या समाधान गर्ने प्रतिबद्धता जनाउँदै शुक्रबार विज्ञप्ति जारी गरेर अवरोध नगर्न अनुरोध गरेका थिए ।
प्रतिक्रिया दिनुहोस !
