तिलोत्तमा गोल्डकपको उपाधि संकटालाई

बुटवलः १९औं तिलोत्तमा गोल्डकपको उपाधि सीएजी संकटा क्लबले जितेको छ । शनिबार भएको फाइनल खेलमा विभागीय टोली त्रिभुवन आर्मी क्लबलाई २-१ गोलअन्तरले पराजित गर्दै संकटाले उपाधि जितेको हो । यो वर्ष पाँचौंपटक आमुन्नेसामुन्ने भएको आर्मीलाई स्तब्ध तुल्याउँदै संकटाले उपाधि जितेको हो । संकटालाई उपाधि दिलाउन मिडफिल्डर नीराजन खड्का नायक साबित भए । टोलीको दुवै गोल उनै नीराजनले गरेका हुन् ।

खेलमा अग्रता भने आर्मीले लिएको थियो । खेल सुरु भएको आधा घन्टा हुँदा राजीव गुरुङले विवेक बस्नेतको पासलाई सदुपयोग गर्दै आर्मीलाई १-० ले अघि बढाएका थिए । तर, संकटा एक गोलले पछि परेको अवस्थाबाट खेलमा फर्कियो । गोल बेहोरेको १० मिनेटपछि नीराजनले संकटालाई १-१ को बराबरीमा फर्काएका थिए । उनले सुशील केसीको पास सदुपयोग गर्दै टोलीका लागि बराबरी गोल गरेका थिए ।

त्यसपछि खेल सकिनु पाँच मिनेटअघि विदेशी खेलाडी मार्टिनको सहयोगमा गोल गर्दै नीराजनले टोलीको जित २-१ ले पक्का बनाएका थिए । उपाधिसहित संकटाले पाँच लाख ५५ हजार पाँच सय ५५ रुपैयाँ प्राप्त गर्‍यो । यस्तै उपविजेता आर्मीले तीन लाख ५५ हजार पाँच सय ५५ रुपैयाँ प्राप्त गर्‍यो । विजेता खेलाडीलाई युवा तथा खेलकुद मन्त्री दलजित श्रीपाइलीले पुरस्कार वितरण गरेका थिए ।

आर्मीले प्राप्त केही राम्रा अवसर सदुपयोग गर्न नसक्दा लगातार दोस्रो वर्ष उपविजेतामै चित्त बुझाउन बाध्य बन्यो । आर्मी गत वर्ष पनि उपविजेतामै सीमित भएको थियो । खेलमा संकटाले पनि केही राम्रा अवसर चुकायो । खेलको १५औं मिनेटमा संकटाका मार्टिनको प्रहार पोस्ट माथिबाट आकासिएको थियो ।
प्रतियोगितामा रूपन्देहीका दिलीप क्षेत्री उत्कृष्ट चुनिए । त्यसबापत उनले एक थान स्कुटर हात पारे । प्रतियोगितामा संकटाका विनय श्रेष्ठ उत्कृष्ट गोलरक्षक ठहरिए । उत्कृष्ट प्रशिक्षक संकटाका सल्यान खड्की घोषित भए । आर्मीका हिरण्य मगर उत्कृष्ट डिफेन्डर घोषित भए भने दीप लामा सर्वाधिक गोलकर्ता बने ।