वाद्यगुरु प्रजापतिलाई नागरिक अभिनन्दन

भक्तपुरः भक्तपुरस्थित मध्यपुर थिमिका वरिष्ठ वाद्य एवं परम्परागत मौलिक नृत्यगुरु श्रीगोपाल प्रजापतिलाई नागरिक अभिनन्दन गरिएको छ । मध्यपुर थिमि नगर क्षेत्रका एक सय एक संघसंस्थाको आयोजनामा ८६ वर्षीय प्रजापतिलाई शताब्दी पुरुष एवं नेपालभाषा एकेडेमीका कुलपति सत्यमोहन जोशीले दोसल्ला ओढाई शनिबार अभिनन्दनपत्र प्रदान गरेका हुन् ।

सिद्धिलाल र लक्ष्मीमाया प्रजापतिको कोखमा १९८७ सालमा जन्मेका प्रजापतिको सम्मानमा प्रकाशन गरिएको चाँदीको सिक्का र पुस्तिका विमोचनसमेत गर्दै शताब्दीपुरुष जोशीले नेपालको मौलिक एवं परम्परागत नाच एवं वाद्यवादनको संरक्षण र सम्वद्र्धनमा प्रजापतिको योगदानको प्रशंसा गरे । ‘प्रजापतिजस्ता सांस्कृतिक धरोहरको माध्यमबाट नयाँ पुस्तामा कला र संस्कृति तथा मौलिक नाच र गीतसंगीत हस्तान्तरण गर्ने प्रबन्ध मिलाउनुपर्छ', जोशीले भने ।

अभिनन्दित प्रजापति सात वर्षको उमेरदेखि नै इन्द्र अप्सरा नाच सिकेर कला क्षेत्रमा प्रवेश गरेका थिए । त्यसपछि निरन्तर मौलिक नाच एवं कला क्षेत्रमा होमिएका उनले भैल प्याखँ (भैरव नाच), महाकाली प्याखँ (महाकाली नाच), अष्टमातृका नाच, भष्मासुर नाच, लाखे नाच, ज्यापूज्यापुनी नाच पनि सिकेका छन् ।
मौलिक एवं परम्परागत वाद्यवादन खिँ, धिमे, मृदङ, दागः खिँ, दाफा खिँ, धाँ वादनमा दखल राख्छन् । यी नाच सिकेर सार्वजनिक रूपमा प्रदर्शन गर्दै आएका प्रजापतिले पछिल्लो समय नयाँ पुस्तालाई आफूले सिकेजानेका नाच र वाद्यवादन सिकाउँदै आएका छन् । यसका लागि उनले ठिमी कला परिषद् नामक सांस्कृतिक संस्थासमेत स्थापना गरेका छन् । प्रजापतिले सयौं युवकयुवतीलाई परम्परागत एवं मौलिक नाच र वाद्यवादन सिकाइसकेको परिषद्का सचिव ज्ञानराम श्रेष्ठले जानकारी दिए ।

पराम्परागत एवं मौलिक नाच र वाद्यवादनको संरक्षण र सम्वद्र्धनमा योगदान गरेका प्रजापतिलाई भक्तपुर, काठमाडौं र ललितपुरका पाँच दर्जनभन्दा बढी संघसंस्थाले यसअघि सम्मान गरिसकेका छन् । उनले शुभराज्याभिषेक पदक, गद्दी आरोहण महोत्सव पदक, श्री ५ वीरेन्द्र ऐश्वर्य सेवा पदक, प्रबल गोर्खा दक्षिणबाहु (चौथो) समेत पाइसकेका छन् ।

भक्तपुरका सांसद रामेश्वरप्रसाद ढुंगेल, प्रमुख जिल्ला अधिकारी द्रोण पोखरेल, मध्यपुर थिमि नगरपालिकाका कार्यकारी अधिकृत कमल ज्ञवाली लगायतले स्थानीय मौलिक कलासंस्कृति र नाच, वाद्यवादन आदिको संरक्षण गर्न सरकारले स्थानीय निकायलाई सक्षम र सबल बनाउनुपर्ने बताए । प्रजापतिलाई अभिनन्दन गर्नुअघि आयोजक समितिका पदाधिकारी बाजागाजासहित बहाखाबजारस्थित प्रजापतिको घर पुगेका थिए ।

दुलहाझैं सिँगारिएका प्रजापतिलाई बाजागाजासहित मध्यपुर थिमिको बालकुमारी मन्दिरसम्म पैदल हिँड्ने क्रममा स्थानीयवासीले सम्मान गर्दै जयजयकार गरेका थिए । उनको गला खादा र फूलमालाले भरिएको थियो । वाद्यवादक तथा परम्परागत नाचका गुरु प्रजापतिको सम्मानमा कार्यक्रमस्थलमा महाकाली नाच, इन्द्र अप्सरा नाच, अष्टमातृका नाच, भष्मासुर नाच, बाँसुरी बाजासमेत प्रस्तुत गरिएको थियो ।