पोलियो थोपा खुवाउन समय थप
काठमाडौः आन्दोलनरत स्वास्थ्यकर्मीले अवरोध गरेपछि शनिबार र आइतबार सञ्चालित पोलियो खोप कार्यक्रमको समय थप गरिएको छ । स्वास्थ्य मन्त्रालयले सबै बालबालिकालाई पोलियो थोपा नखुवाउन्जेल खोप कार्यक्रमलाई निरन्तरता दिन समय थपेको हो ।
स्वास्थ्य मन्त्रालयका प्रवक्ता डा. भोगेन्द्रराज डोटेलले सबै बालबालिकालाई खोप नलगाएसम्म कार्यक्रमलाई निरन्तरता दिइने बताए । सरकारले सन् २०१५ मा नेपालबाट पोलियो रोग उन्मूलन भएको घोषणा गरेको थियो । ‘२०१९ भित्र पोलियो निर्मूल गर्ने लक्ष्य भएकाले आन्दोलनकै कारण खोप रोकिँदैन', उनले भने।
डोटेलका अनुसार एक सातामा १५ जिल्लाका १६ लाख बालबालिकालाई पोलियो थोपा खुवाइसकिनेछ । ‘खोप अवरुद्ध पार्ने कर्मचारी पहिचान गरी नाम संकलन गर्दैछौं', उनले भने, ‘जनहित र कर्तव्य बिर्सने कर्मचारी निलम्बन गरी हदैसम्मको कारबाही गर्ने तयारी मन्त्रालयले गरेको छ ।'
मन्त्रालयले तराईका कैलाली, बर्दिया, बाँके, कपिलवस्तु, पर्सा, बारा, रौतहट, धनुषा, महोत्तरी, सप्तरी, सिराहा, सुनसरी र उपत्यकाका काठमाडौं, भक्तपुर र ललितपुर जिल्लामा गरी करिब १६ लाख बालबालिकालाई पोलियो खोपका थोपा खुवाउँदै आएको छ ।
दरबन्दी सिर्जना गर्ने प्रस्ताव मन्त्रिपरिषद्बाट स्वीकृत भइसकेको र स्वास्थ्य सेवा ऐन संशोधन गरी ३ महिनाभित्र समस्या समाधान गर्न प्रतिबद्धता जनाउँद शुक्रबार स्वास्थ्यमन्त्रीले विज्ञप्ति जारी गर्द खोपमा अवरोध नगर्न अनुरोध गरेका थिए ।
हेल्थपोस्ट इन्चार्ज बनाउन माग गर्दै आन्दोलनरत सिनियर अहेवहरूले खोप ढुवानी अवरोध र तालाबन्दी गरी पोलियो खोप कार्यक्रममा अवरोध गरेका थिए । बालबालिकाले खोप लगाउनु उनीहरूको नैसर्गिक अधिकार र त्यसको जिम्मेवारी स्वास्थ्यकर्मीको भएकाले व्यक्तिगत स्वार्थका कारण लाखौंलाख बालबालिकाको अधिकार हनन गर्न नमिल्ने मन्त्रालयको ठहर छ । बालबालिकाको भविष्यमाथि खेलबाड गरेर ठूलो गल्ती गरेको भन्दै खोपमा अवरोध गर्ने कर्मचारीमाथि कारबाही गर्ने तयारी गरेको मन्त्रालयले जनाएको छ ।
स्वास्थ्यमन्त्री गगन थापाले दरबन्दी सिर्जना गर्ने प्रस्ताव मन्त्रिपरिषद्बाट स्वीकृत भइसकेको र स्वास्थ्य सेवा ऐन संशोधन गरी ३ महिनाभित्र समस्या समाधान गर्न प्रतिबद्धता जनाउँदै शुक्रबार विज्ञप्ति जारी गरी खोपमा अवरोध नगर्न अनुरोध गरेका थिए । तर अनुरोध गर्दागर्दै पनि अवरोध गर्ने स्वास्थ्यकर्मीको सूची तयार पारी कारबाही प्रक्रिया अगाडि बढाएको मन्त्रालयले जनाएको छ ।
प्रतिक्रिया दिनुहोस !
