बन्दको दोस्रो दिन कपिलवस्तु ठप्प
कपिलवस्तु: संयुक्त लोकतान्त्रिक मधेशी मोर्चाको बन्दले जिल्लाको जनजीवन पूर्ण प्रभावित भएको छ । सप्तरी घटनाको विरोधमा आह्वान गरिएको दुर्इ दिने बन्दको दोस्रो दिन बुधबार सदरमुकाम तौलिहवालगायत सबै बजार क्षेत्रर पूर्ण रुपमा बन्द रहे।
मोर्चाका नेता, कार्यकर्ताले बिहानैदेखि सदरमुकाम तौलिहवामा प्रदर्शन गरेका थिए । बन्दकर्ताले सरकार र एमालेविरुद्ध चर्को नाराबजी गरेका थिए । बन्दका कारण बहादुरगंज, महाराजगंज, तौलिहवा, कृष्णनगर, चन्द्रौटा, पकडीलगायतका बजार पूर्ण रुपमा बन्द भए ।
बन्दकर्ताले पूर्व-पश्चिम राजमार्ग, तौलिहवा लुम्विनी, चन्द्रौटा कृष्णनगर, जितपुर तौलिहवा सडक खण्डमा कुनै सवारी साधन चल्न दिएनन् ।
मोर्चा कार्यकर्ताले बन्दको अवज्ञा गरेको भन्दै तौलिहवाको एक होटल तोडफोड गरेका छन् । बन्दका कारण सुठौली, छोटी भन्सार र कृष्णनगर भन्सार नाका दुवै ठप्प हुँदा राजश्व संकलन कार्य प्रभावित भएको छ । बन्दका क्रममा जिल्लामा कुनै अप्रिय घटना नघटेको प्रहरी उपरीक्षक भोजजंग शाहले बताए ।
प्रतिक्रिया दिनुहोस !
