तेहरानः संयुक्त राज्य अमेरिका र बेलायतको संयुक्त साझेदारीको युद्धपोत इरानको सामुद्रिक क्षेत्रमा जबरजस्ती पसेर तनाव सिर्जना गरेको इरानले आरोप लगाएको छ । एउटा नौ-सैनिक युद्धपोत, स्ट्रेट अफ हर्मसमा पर्ने इरानको सामुद्रिक इलाकामा अनधिकृत तरिकाबाट जबरजस्ती प्रवेश गरी इरानी सुरक्षाकर्मी (रिभोल्युसनरी गार्ड) का सुरक्षा पोतहरूलाई हानि पुर्याउन खोजेको इरानले बताएको छ ।
शान्त रहेको इरानको सामुद्रिक क्षेत्रमा ती दुई देशले तनाव सिर्जना गराउन खोजेको आरोप इरानले लगाएको छ । उत्तरमा इरान र दक्षिणमा कुवेत, बहराइन, कतार, युनाइटेड अरब इमिरेट्स र ओमानको बीचमा रहेको सामुद्रिक खण्ड पर्सियन गल्फभित्र रहेको सामुद्रिक उपखण्ड - स्ट्रेट अफ हर्मसलाई इरानले आफ्नो निर्बाध आर्थिक क्षेत्रको रूपमा उपयोग गर्दै आएको छ ।
सिसीको घाँटी (बोटल नेक) को आकारमा रहेको स्ट्रेट अफ हर्मसको सबभन्दा साँघुरो खण्डको चौडाइ २१ नटिकल माइल (करिब ३९ किलोमिटर) मात्र रहेको छ । कुवेत, बहराइन, कतार, युनाइटेड अरब इमिरेट्स इत्यादि मुलुकहरूका सामुद्रिक क्षेत्रबाट उत्खनन गरिने (सि-बोर्न) विश्वको करिब ३० प्रतिशत इन्धन यही सामुद्रिक मार्गबाट बाहिरिई अन्यत्र ढुवानी गरिने हुँदा अन्तर्राष्ट्रिय रूपमा यस इलाकाको उच्च आर्थिक महत्व रहेको बताइन्छ ।
यता, केही दिनअघि उक्त मार्ग नै परिवर्तन गर्नुपरेको अमेरिकी नौसेनाका एक अधिकारीले बताएका थिए । इरानी डुंगाहरूले अमेरिकी युद्धपोतको मार्गमा अवरोध उत्पन्न गरेको नभई बरु अमेरिकी युद्धपोत इरानद्वारा निषेधित सामुद्रिक इलाकामा प्रवेश गरी निहुँ खोज्ने काम गरेको भनी इरानको रिभोल्युसनरी गार्डका कप्तान मेहदी हसिमको भनाइ छ ।
स्ट्रेट अफ हर्मसमा इरानी नौसेनाका जहाजहरू बारम्बार अव्यावसायिक र गैह्रजिम्मेवार ढंगले प्रवेश गरी अमेरिकी युद्धपोतसँग निहुँ खोज्दै आएको भनी अमेरिकाले दोष लगाउँदै आएको छ । इरानी नौसेनाका जहाजका चालकहरू अव्यवहारिक भएको भन्दै अमेरिकाले आलोचना गरेको थियो । —रासस/एपी
प्रतिक्रिया दिनुहोस !
