खोलामा बस खस्दा टुक्राटुक्राः २६ को मृत्यु, ३६ जना घाइते

जाजरकोटः जिल्ला सदरमुकाम खलंगाबाट साल्म गाविस खाराका लागि छुटेको ना ३ ख २२७९ नम्बरको यात्रुवाहक बस बिहीबार छिन्चु–जाजरकोट सडकखण्डको बोहरा गाउँनजिकै दुर्घटनामा पर्दा २६ जनाको मृत्यु भएको छ । घटनामा परी ३६ जना घाइते भएको प्रहरीले जनाएको छ । गाडीमा १५ जना र उपचारका क्रममा ९ जनाको जिल्ला अस्पतालमा मृत्यु भएको जानकारी जिल्ला प्रहरी प्रमुख प्रहरी नायब उपरीक्षक भावेश रिमालले दिए । तेईसजना यात्रु लिएर ५ बजे बसपार्कबाट छुटेको ५ मिनेटमै गाडी दुर्घटनामा परेको हो ।

बसपार्कबाट करिब ४ किलोमिटर दूरीमा पर्ने भेरीमालिका नगरपालिका ४ बोहरागाउँनजिकै जंगलको मोडबाट ३ सय मिटर तल पासागाड खोलामा खसेको बस टुक्राटुक्रा भएको छ । बाटोमा यात्रु थप्दै हिँडेको बसमा कम्तीमा ६२ सवार रहेको प्रहरीको भनाइ छ ।

थोत्रो बस, यात्रुको अत्यधिक चाप, ओरालोमा तीव्र गतिमा कुदाउँदा अनियन्त्रित भई दुर्घटना भएको घाइतेले बताए । घाइतेको जिल्ला अस्पतालमा प्राथमिक उपचार गरिएको थियो । बेड अभावमा अस्पतालको खुला चौरमा घाइतेको प्राथमिक उपचार गरिएको थियो । अधिकांश घाइतेको अवस्था गम्भीर रहेको जिल्ला अस्पतालकी प्रमुख डा. चाँदनी जैसवालले बताइन् । थप उपचारका लागि २८ जना गम्भीर घाइतेलाई चौरजहारीस्थित मिसन अस्पताल पठाइएको छ । घाइतेको थप उपचारका लागि हेलिकोप्टरबाट राति नै नेपालगन्ज पठाउने तयारी भइरहेको प्रहरी नायब उपरीक्षक रिमालले बताए ।

बसको झ्यालबाट हामफालेर बाँचेका रुकुम चौरजहारीका प्रदीप लामिछानेले यात्रुको चाप अधिक रहेको थोत्रो बस ब्रेक फेल भएर दुर्घटनामा परेको बताए । गाडीचालक टोपबहादुर चन्दले ब्रेक फेल भएकाले दुर्घटना भएको बताए ।

गोरु तिरुवा, मजकोट ७, घाइते

सिट भरिएर क्याबिन र कोलिया पूरै भरिएको थियो । कोलियामा यात्रु उभिएका थिए । बस तीव्र गतिमा हुइँक्याइएको थियो । बस छुटेको ५ मिनेट मात्र भएको थियो । एक्कासि बम पड्केको जस्तो आवाज आयो । अस्पताल आएपछि मात्र आफू घाइते भएको थाहा पाएँ । परिवारका ८ जना सँगै बस चढेका थियौं । अरू कहाँ छन्, के भयो, केही थाहा छैन ।

बिना खत्री, कार्कीगाउँ ३, घाइते

बसमा कोचाकोच यात्रु थिए । निकै थोत्रो बसमा पाइला टेक्नेसम्म ठाउँ नराखेर यात्रु कोचेपछि सुरुमै डर लागेको थियो । छुटेको ५÷७ मिनेटमै गाडी दुर्घटनामा परिहाल्यो । ओरालो बाटो मोडमा बस नमोडिएर सीधै भिरमा खस्यो । खुट्टामा सामान्य चोट लागेकाले आफैं हिँडेर सडकमा आएँ । त्यसपछि सेनाको गाडीले हस्पिटल ल्यायो । कडा चट्टाने भीरमा सीधै खसेको बस नै टुक्राटुक्रा भएको छ । चन्द्रबहादुर भारती, जिल्ला कृषि विकास कार्यालयका कर्मचारी

अफिसको काम सकेर घर फर्कंदै थिए । मेरो घर अफिसदेखि करिब १० किलोमिटर टाढा पर्छ । बसमा खुट्टा टेक्नेसम्म ठाउँ थिएन । घर पुग्न हतारले त्यही बसमा उभिएको थिएँ । बसले चार किलोमिटर मात्र पार गरेपछि मोड आयो । त्यो मोडबाट बस सीधै भिरमा खस्यो । मानिसहरू एक्कासि चिच्याएको र ठूलो आवाज आएकोसम्म थाहा पाउँछु ।