नेपालगन्ज गोल्डकपः सुदूरपश्चिम–११ विजयी
नेपालगन्जः टुबोर्ग दोस्रो नेपालगन्ज गोल्डकप फुटबल प्रतियोगिता बिहीबारदेखि नेपालगन्जमा सुरु भएको छ । बाँके जिल्ला फुटबल संघको आयोजनामा पश्चिम नेपालकै सर्वाधिक पुरस्कार राशि भएको सो फुटबल प्रतियोगिताको अखिल नेपाल फुटबल संघ (एन्फा)का अध्यक्ष नरेन्द्र श्रेष्ठले उद्घाटन गरे ।
उद्घाटन खेलमा साविक विजेता सुदूरपश्चिम–११ ले भारतको दिल्ली युनाइटेडलाई १–० गोलले हरायो । सुदूरपश्चिम–११ को जितमा एरोनले २२औं मिनेटमा गरेको गोल नै निर्णायक साबित भयो । पहिलो हाफमा अत्यन्त प्रतिस्पर्धात्मक रूपमा खेल भएको थियो । पटकपटक प्रयास गर्दासमेत दुवै तर्फबाट गोल प्रयास भए पनि सफल भएन ।
खेलपछि सुदूरपश्चिमका प्रशिक्षक ललित चन्दले खेल जिते पनि आफ्नो सन्तोषजनक प्रदर्शन देखाउन नसकेको बताए । उनले सुदूरपश्चिममा पुराना खेलाडी र नयाँ विदेशी खेलाडीबीच तालमेलको समस्या भएको बताए । मिड फिल्ड र दुईजना फरवार्ड ओवरिकोस्टका खेलाडी सुदूरपश्चिमका तर्फबाट खेलेका छन् । उनले भने, ‘विदेशी खेलाडी पहिलोपटक आबद्ध भएका कारण उनीहरू र पुराना खेलाडीको तालमेल मिलेन, त्यस कारण पनि भनेजस्तो खेल प्रदर्शन भएन ।'
दिल्ली युनाइटेडका प्रशिक्षक अन्शुल काटियारले खलाडीले राम्रो खेले पनि मौकाको सदुपयोग गर्न नसकेको बताए । शुक्रबार नेपाल पुलिस क्लब र आयोजक नेपालगन्ज–११ बीच प्रतिस्पर्धा हुनेछ । प्रतियोगितामा ‘ए' डिभिजनलगायत आठ टोलीको सहभागिता छ । प्रतियोगिताको विजेता टोलीले पाँच लाख र उपविजेताले दुई लाख ५१ हजार रुपैयाँ पुरस्कार पाउनेछन् । विधागत तर्फका उत्कृष्ट खेलाडीले पनि आकर्षक पुरस्कार हात पार्नेछन् ।
प्रतिक्रिया दिनुहोस !
