दिल्लीमा गृहमन्त्री निधिले सुरु गरे राजनीतिक भेटवार्ता
काठमाडौं : प्रति आतंकवाद सम्बन्धी तेस्रो अन्तराष्ट्रिय सम्मेलनमा भाग लिन सोमबार साँझ नयाँ दिल्ली पुगेका उपप्रधान तथा गृहमन्त्री बिमलेन्द्र निधि र भारतका पूर्व प्रधानमन्त्री मनमोहन सिंहबीच मंगलबार भेटवार्ता भएको छ।
सिंहको निवासमा भएको भेटमा पूर्व प्रधानमन्त्री सिंहले दुई देशीचको सम्बन्ध, नेपालको शान्ति प्रकृया र विकासका बारेमा जिज्ञासा राखेका छन् । भेटमा गृहमन्त्री निधिले नेपालको पछिल्लो राजनीतिक अबस्थाबारे जानकारी गराएको उनका प्रेस संयोजक रामजी दाहालले जानकारी दिए ।
भेटमा पूर्व प्रधानमन्त्री सिंहले राजनीतिक स्थिरतापछि विकास निर्माणको कामले गति लिने उल्लेख गर्दै एउटा असल छिमेकीका नाताले भारत सधैं नेपालमा राजनीतिक स्थिरता भएको हेर्न चाहेको बताएका छन् ।
उनले दुई देशबीचको पुरानो सम्बन्धलाई उच्च प्राथमिकतामा राख्दै भोलिका दिनमा सम्बन्धलाई अझ प्रगाढ बनाउनुपर्नेमा जोड दिए । भेटमा उपप्रधानमन्त्री निधिका साथ भारतका लागि नेपाली राजदूत दीपकुमार उपाध्याय पनि सहभागी थिए।
सँगै, मंगलबार नै गृहमन्त्री निधिले भारतीय कम्युनिष्ट पार्टीका नेता डीपी त्रिपाठीसँग पनि भेटघाट गरेका छन् । भेटमा दुई देशबीचको सम्बन्ध र नेपालको पछिल्लो राजनीतिक घटनाक्रमबारे छलफल भएको छ ।
प्रतिक्रिया दिनुहोस !
