मापदण्ड मिच्दै जगदम्बा

काठमाडौः मापदण्डविपरीत सहरको मध्यभागमा बन्दै गरेको जगदम्बा हस्पिटालिटीको होटेल हिल्टनबारे छानबिन गर्न काठमाडौं महानगरपालिका, सडक विभाग, अख्तियार दुरुपयोग अनुसन्धान आयोग र व्यवस्थापिका संसद्को सुशासन तथा अनुगमन समितिले बेग्लाबेग्लै चार टोली बनाएका छन् ।

अख्तियार दुरुपयोग अनुसन्धान अयोग र व्यवस्थापिका संसद्को सुशासन तथा अनुगमन समितिले छानबिन थालेपछि महानगरपालिका र विभागलाई पनि होटल निर्माणका क्रममा भएको बदमासीबारे छानबिन गर्न दबाब बढेको हो ।महानगरपालिकाले ठूलो रकमको चलखेलमा हिल्टनको नक्सा पास गरेको आरोप लाग्दै आएको छ । महानगरपालिकाबाट यस क्रममा भएका अनियमितता छानबिन गर्न भवन निर्माण इजाजत विभागका इन्जिनियर वीरबहादुर खड्काको संयोजकत्वमा पाँच सदस्यीय क्षतिपूर्ति मूल्यांकन समिति गठन भएको छ । त्यस्तै, सडक विभागले मध्यमाञ्चल क्षेत्रीय सडक निर्देशनालयका प्रमुख अयोध्याप्रसाद श्रेष्ठको संयोजकत्वमा प्राविधिक समिति गठन गरेको छ।

समितिमा भवन निर्माण विकास विभाग, खानेपानी, नेपाल टेलिकम, विद्युत् प्राधिकरण र नगरपालिका सदस्य थिए । सडक विभागका प्रवक्ता तथा सूचना अधिकारी दयाकान्त झाले होटल निर्माणका क्रममा भएको बदमासीका कारण सडक संरचना भास्सिएको र अन्य क्षति विवरणबारे छानबिन गर्न टोली गठन गरिएको बताए ।उनले अन्नपूर्णसँग भने, ‘अयोध्याजी संयोजकत्वको टोलीले प्रतिवेदन बुझाइसकेको छ । हामीले सडक र पेटी निर्माणका लागि धरौटी बुझिसकेका छौं ।'

टोलीका संयोजक श्रेष्ठले होटेल बनाउँदा जगदम्बा हस्पिटालिटीले मुख्य सडकबाट ६ मिटर छाडेर निर्माण गर्नुपर्नेमा सडकसँगै टाँसेर नियामक निकायलाई बेवास्ता गरेको बताए ।उनले भने, ‘मापदण्डभित्रै नपर्ने होटल निर्माणका लागि कसरी महानगरपालिकाले नक्सा पास गर्‍यो ? सडक पेटी जगदम्बाले अझै किन बनाएन ? हामीले जगदम्बाको ६५ लाख रुपैयाँ धरौटीमै राखेका छौं । पेटी नबनेसम्म धरौटी फिर्ता गर्दैनौं ।' उनले होटलको डिजाइन गर्ने बेलामा माटो परीक्षण नगरी हचुवामा काम गरेर जगदम्बा हस्पिटालिटीले बदमासी गरेको आरोप लगाए ।

‘मापदण्डभित्रै नपर्ने जगदम्बा हस्पिटालिटीको निर्माणका लागि कसरी महानगरपालिकाले नक्सा पास गर्‍यो ? '
अयोध्याप्रसाद श्रेष्ठ, मध्यमाञ्चल क्षेत्रीय सडक निर्देशनालय प्रमुख

काठमाडौं महानगरपालिकाले जगदम्बा हस्पिटालिटीद्वारा नक्सालमा बन्दै गरेको होटेल हिल्टनको नक्सा पास गर्नुअगाडि फिल्डमा गएर हेर्ने, स्थानीयको रोहबरमा स्वीकृति लिने र होटेल स्थापना गर्दा हुनसक्ने क्षतिको आकलनसमेत नगरी हचुवामै गत जेठ १७ मा नक्सा पास गरेको थियो । अख्तियारले पनि होटेलको नक्सापासलगायत फाइल तानेर अनुसन्धान थालेको छ । महानगरपालिकाका केही कर्मचारी हिल्टनको नक्सा पासमा करोडौं रकमको चलखेल भएको दाबी गर्छन् । यही काण्डमा कार्यकारी अधिकृत रुद्रसिंह तामाङलाई मन्त्रालय तानिएको स्रोत बताउँछ ।

जिल्ला प्रशासन कार्यालय काठमाडौंको विरोध रहँदारहँदै पनि जगदम्बाले आफूखुसी कार्यान्वयन पक्षलाई रिझाएर होटल निर्माणको काम थालेको हो । महानगरपालिकाले काठमाडौं उपत्यका विकास प्राधिकरण जिल्ला आयुक्तको कार्यालयले दिएको योजना स्वीकृतिका आधारमा आफूले ‘प्लिन्थ लेभल' सम्मको निर्माण कार्य गर्न इजाजत दिएको दाबी गरेको छ । अख्तियार प्रवक्ता जीवराज कोइरालाले हिल्टन प्रकरणमा प्राविधिक संलग्न अध्ययन टोली गठन गरिएको बताए । ‘विज्ञ समूहले प्रतिवेदन तयार गर्दैछ । त्यसपछि छानबिन गरी अगाडि बढ्ने वा नबढ्ने विषयमा टुंगो लाग्छ', उनले भने ।

अख्तियारको प्राविधिक टोलीले स्थलगत अनुगमन गरी रिपोर्ट तयार गर्नेछ । अनुगमन प्रतिवेदन अन्तिम चरणमा पुगेको अख्तियार स्रोतले बताएको छ । जगदम्बालाई होटेल निर्माणका क्रममा सडक पेटी खन्न सरकार आफैंले स्वीकृति दिएको थियो । सडक पेटी खन्न स्वीकृति लिँदै मध्यमाञ्चल क्षेत्रीय सडक निर्देशनालयको डिभिजन सडक कार्यालयलाई उसले दुई लाख ७८ हजार नौ सय ५ रुपैयाँ धरौटी बुझाएको थियो । जेठ मसान्तभित्रै सडक पेटी निर्माण गरिसक्ने बताए पनि हिल्टनले पुनः म्याद थप गरी साउन २५ सम्मको समय डिभिजन कार्यालयसँग मागेको छ ।