इसुजुका नयाँ मोडल नेपालमा

काठमाडौंः  जापानी गाडी निर्माता कम्पनी इसुजुले नयाँ दुई मोडलका गाडी नेपाल भित्र्याएको छ । इसुजुका डी-म्याक्स भी-क्रस र एस क्याब पिकअप गाडी नेपाल भित्रिएका हुन् । कन्टिनेन्टल ट्रेडिङ इन्टरप्राइजेजले इसुजुका दुवै मोडल बिहीबार काठमाडौंमा सार्वजनिक गरिएको थियो । कन्टिनेन्टल ट्रेडिङ कम्पनी इसुजु गाडीको नेपालका लागि आधिकारिक बिक्रेता हो । नेपाली बजारमा इसुजु डी-म्याक्सको मूल्य ७२ लाख ९० हजार र भी-क्रसको ६० लाख ९० हजार रुपैयाँ तोकिएको छ ।

इसुजुका डी-म्याक्स र भी-क्रस सेकेन्ड जेनेरेसनका पिकअप गाडी हुन् । यीनमा एक सय ३४ एचपी हाई प्रेसर डिजल इन्जिन प्रयोग गरिएको छ । गाडीमा पाँच स्पिड म्यानुअल ट्रान्समिसन छ । २५ सय सीसीको गाडी अफ रोडका लागि उपयोगी रहेको कम्पनीको दाबी छ । उच्च ग्राउन्ड क्लियरेन्स रहेको गाडीमा फोर ह्विल ड्राइभ मोड रहेको छ ।

डी-म्याक्स एस-क्याब नयाँ जेनेरेसनको डिजेल इन्जिन गाडी हो । यो गाडी पाँच सिट क्षमताको छ । खासगरी बिजनेसम्यान र प्रोफेसनलका लागि यो गाडी उपयुक्त हुने कम्पनीको भनाइ छ । यो पनि २५ सय सीसीको गाडी हो । यसमा पनि पाँच स्पिड म्यानुअल गियर रहेको छ । यसमा ५५ लिटर क्षमताको इन्धन ट्यांकी रहेको छ । सुरक्षित, आरामदायी र सजिलो गाडीका रूपमा यसलाई बजारमा ल्याएको कम्पनीले बताएको छ ।

नेपालमा पिकअप गाडीको राम्रो सम्भावना देखेर नयाँ मोडल बजारमा ल्याएको इसुजु मोटर्स इन्टरनेसनल अप्रेसन थाइल्यान्डका कार्यकारी उपाध्यक्ष टोरू किसोमोटोले बताए । उनले इसुजुका पिकअप गाडीले नेपालीको मन जित्ने विश्वास व्यक्त गरे । नेपालको भौगोलिक संरचना र सडकको अवस्था पिकअप गाडी सुहाउँदो छ । विकासे मन्त्रालय तथा निकाय र विभिन्न प्रोजेक्टमा पिकअप गाडी बढी प्रयोग हुन्छन् ।

कन्टिनेन्टल ट्रेडिङ इन्टरप्राइजेजका अध्यक्ष सुह्रिद घिमिरेले इसुजु डी-म्याक्स पिकअप बजारमा युटिलिटी भेहिकलका रूपमा लोकप्रिय हुने बताए । नेपालमा धेरै वर्षदेखि जापानीज इसुजु गाडी हुइँकिदै आइरहेका छन् । कन्टिनेन्टल ट्रेडिङले इसुजुको आधिकारिक सर्भिस सेन्टर काठमाडौंको बालाजुमा रहेको बताउँदै देशका अन्य सहरमा कियाको नेटवर्कमार्फत सेवा उपलब्ध गराउने जनाएको छ ।

जापानमा मुख्यालय रहेको इसुजु विश्वब्यापी गाडी उत्पादक कम्पनी हो । एक सयभन्दा बढी देशमा इसुजुले आफ्ना गाडी बिक्री गर्दै आएको छ । नेपालमा आउने अधिकांश पिकअप भारतमा उत्पादित गाडी हुन् । केही मोडल थाइल्यान्डबाटसमेत आयात गरिँदै आएको छ । राजधानीमा इसुजुको सोरुम गैरीधारामा छ ।