फ्याक्ट्स अफ नेपाल २०१७ सार्वजनिक
काठमाडौः फ्याक्ट्स रिसर्च एन्ड एनालिटिक्स र वी-रिडद्वारा ‘फ्याक्ट्स अफ नेपाल २०१७' सार्वजनिक गरेको छ । बुधबार एक कार्यक्रमबीच फ्याक्ट्स वर्ष पुस्तकको तेस्रो संस्करणका रूपमा उक्त पुस्तक बिमोचन गरिएको हो । फ्याक्ट्स अफ नेपालको अघिल्लो संस्करणलाई पाठकले रुचाएकाले पुस्तकको नयाँ संस्करण २०१७ अनावरण गरिएको संस्थाले जनाएको छ । विगत वर्षमा सूचनामूलक दृश्यचित्र (इन्फोग्राफिक्स)का लागि विभिन्न क्षेत्रबाट तथ्यांक संकलन गरी सरल र सहज ढंगले पुस्तकमा समेटिएको छ ।
यस पुस्तकमा कृषि, अर्थतन्त्र, राजनीतिलगायतका कुल १९ खण्ड छन् । पुस्तकमा नेपालको प्रमुख क्षेत्रको क्षेत्रगत अवस्थाका साथसाथै अन्तर्राष्ट्रिय मामिलाको विश्लेषणात्मक चित्रण गर्ने प्रयास गरिएको छ । पुस्तक कर्पोरेट, सामाजिक, देशको विकास र राजनीतिबीच लोकप्रिय छ ।
पुस्तकको मूल्य तीन सय रुपैयाँ तोकिएको छ । पुस्तक देशका प्रमुख पुस्तक पसलमा उपलब्ध हुनुका साथै यसको इ-बुक वि-रिडको मोबाइल एप्लिकेसनबाट डाउनलोड गरेर पनि पढ्न सकिनेछ । निजी अनुसन्धानमूलक कम्पनी फ्याक्ट्सले विभिन्न परियोजना सञ्चालन गर्नुको साथै सामाजिक सञ्जाल र छापा माध्यममार्फत आम जनताका लागि दैनिक, साप्ताहिक र मासिक रूपमा सूचनामूलक तथ्यांक चित्र प्रस्तुत गर्दै आइरहेको संस्थाले जनाएको छ ।
प्रतिक्रिया दिनुहोस !
