एमालेको सहयोग गौतम परिवारको हातमा
महेन्द्रनगर : भारतीय सुरक्षाकर्मीबाट मारिएका सहिद गोविन्द गौतमको परिवारलाई एमालेले दिएको सहयोग रकमको चेक शनिबार उपलब्ध गराइएको छ । एमाले केन्द्रीय कमिटीले प्रदान गरेको पाँच लाख रकमको चेक शनिबार सहिद परिवारलाई बुझाइएको हो ।
एमालेका उपाध्यक्ष एवं पूर्वउपप्रधानमन्त्री भीम रावलले पाँच लाख रकमको चेक सहिद गौतमकी आमालाई हस्तान्तरण गरे । सहिद गोविन्दकी पत्नी लक्ष्मी गौतमका नाममा रहेको चेक र एकथान ल्यापटप हस्तान्तरण गरिएको हो ।
कञ्चनपुरको महेन्द्रनगरमा बिहीबार आयोजना गरिएको आमसभाका क्रममा एमाले अध्यक्ष केपी शर्मा ओलीले पार्टीका तर्फबाट सहिद परिवारलाई पाँच लाख रकम सहयोग घोषणा गरेका थिए । शनिबार एमाले उपाध्यक्ष भीम रावलसहितका नेता सहिद गौतमको घर पुगेर चेक हस्तान्तरण गरेका हुन् ।
एमाले पुनर्वास नगर कमिटीले समेत तत्काल राहतका लागि १२ हजार रकम उपलब्ध गराएको छ । एमालेले सहिद गौतमका तीनवटै छोरीलाई स्थानीय युगज्योति बोर्डिङ स्कुलमा पढाउने व्यवस्था मिलाएको छ ।
प्रतिक्रिया दिनुहोस !
