कर्ण लिम्बूको को आगमनमले झापावासीमा खुशी

बिर्तामोडः  नेपालका मैदानमा आयोजना हुने गोल्डकप फुटबल प्रतियोगितामा एउटा चर्चित अनुहार हो- कर्ण लिम्बू । विगत केही वर्षदेखि रमपम झापा ११ बाट फरवार्डमा खेल्ने लिम्बूले गोल नगरेका प्रतियोगिताहरू कमै छन्् । छोटो कद तर निकै ख्याति कमाएका लिम्बू यसपालि राष्ट्रिय टोलीमा समावेश भएका छन् ।

आगामी चैत १५ गते फिलिपिन्समा हुने एएफसी कप छनोटअन्तर्गत फिलिपिन्ससँगको खेलका लागि २० सदस्यीय राष्ट्रिय टोलीमा कर्ण लिम्बू पनि यसपालि परेका छन् । जसले वर्तमानमा उनले खेल्दै गरेको झापाको फुटबललाई हौसला बढाएको छ । झापाबाट खेल्ने धेरै फुटबलर राष्ट्रिय टोलीमा विगतमा नपरेका होइनन् । तर लिम्बूले राम्रो खेल प्रदर्शन गर्दा पनि किन राष्ट्रिय टोलीमा पर्न सकेनन् भन्ने प्रश्न फुटबल बुझेकाहरूले नै गर्ने गरेका थिए । तर अखिल नेपाल फुटबल संघ एन्फाको छनोटमा यस पटक उनी परेपछि झापाली फुटबलप्रेमीहरू खुसी देखिएका छन् ।

विगत लामो समयदेखि कर्णको खेल हेरेका र उनलाई प्र्रशिक्षणसमेत दिएका फुटबल प्रशिक्षक भगीरथ आलेले ढिलै भए पनि उनलाई राष्ट्रिय टोलीमा समावेश गरेर एन्फाले राम्रो काम गरेको बताए । आलेको नजरमा कर्ण एक इमानदार खेलाडी हुन् । उनी भन्छन्, ‘कर्णमा स्ट्राइकरमा हुनुपर्ने सम्पूर्ण गुण हुँदाहुँदै पनि अहिलेसम्म राष्ट्रिय टोलीमा पर्न नसक्नु दुर्भाग्य थियो । तर ढिलै भए पनि राम्रो निर्णय भएको छ ।' कर्णमा फरवार्ड खेल्दा तत्काल निर्णय गर्ने क्षमता भएको आले बताउँछन् । कतिपयले उनलाई राम्रो खेल्दा पनि राष्ट्रिय टोलीमा पर्न नसक्नुमा ‘अभागी खेलाडी' समेत भन्ने गर्थे ।

झापा जिल्ला फुटबल संघका अध्यक्ष जलकुमार गुरुङले कर्ण लिम्बूलाई नेपाली फुटबलले बल्ल चिनेको प्रतिक्रिया दिएका छन् । यो पटक छनोटमा परेर आफ्नो खेलप्रतिको इमानदारीले उनले देखाएको गुरुङले बताए । उनले भने, ‘यसपालि झापाबाट तीनजना टोलीमा परेका छन् । त्यसमा कर्ण लिम्बू पर्नु हाम्रा लागि खुसीको कुरा हो ।' झापाबाट अनन्त तामाङ, विशाल राई र कर्ण लिम्बू राष्ट्रिय टोलीका लागि छनोट भएका छन् ।

फुटबलर लिम्बूले भने अहिलेसम्म आफूले कमाएको ख्यातिलाई अन्तर्राष्ट्रिय क्षेत्रमा पुर्‍याउने आफ्नो लक्ष्य रहेको बताएका छन् । अन्तर्राष्ट्रिय क्षेत्रमा आफूले अझ धेरै गर्न बाँकी रहेको र आफूमाथि चुनौती थपिएको उनले अन्नपूर्णसँग बताए । लिम्बूले भने, ‘मेरा लागि अवसरसँगै चुनौती पनि थपिएका छन् । अहिलेसम्म मैले पाएको रेप्युटेसन कायम राख्न मेरा लागि जोखिमसमेत छ ।'

लिम्बूले २०५७ सालदेखि फुटबल खेल्न सुरु गरेका हुन् । उनी २०६३ सालमा एनआरटीमा समावेश भए । २०६६ सालमा उनले मछिन्द्र क्लबबाट फुटबल खेले । त्यसपछि २०६८ मा जावलाखेल युथ क्लबमा समावेश भए । फेरि २०६९-७० मा मछिन्द्र नै फर्के । झापा ११ का लागि उनी २०७१ सालदेखि लगातार खेलिरहेका छन् ।