उत्तर प्रदेशमा मूल मुद्दा विकासः योगी

लखनउः भारतको उत्तर प्रदेशका मुख्यमन्त्रीको शपथ ग्रहणलगत्तै योगी आदित्यनाथले आफ्नो सरकारको मूल लक्ष्य विकास भएको बताएका छन् । मुख्यमन्त्रीको हैसियतमा उनको पहिलो ट्विटमा आफ्नो सरकारले युवालाई रोजगार दिने र स्वरोजगार सिर्जना गर्ने स्पष्ट पारेका छन् ।

उनले युवाहरूलाई रोजगार वृद्धिका लागि सीप विकास केन्द्रको स्थापना गरिने र त्यहाँबाट उत्पादित जनशक्तिलाई काममा लगाइने जानकारी दिएका छन् । जनताले परिवर्तन चाहेको र त्यसलाई पूरा गर्न आफू लागिपर्नेमा उनले प्रतिबद्धता व्यक्त गरेका छन् ।

यसैगरी भारतीय प्रधानमन्त्री नरेन्द्र मोदीले ट्विटमार्फत उत्तर प्रदेशका मुख्यमन्त्री योगी आदित्यनाथ, उपमुख्यमन्त्रीहरू केशवप्रसाद मौर्य र दिनेश शर्मालाई बधाई दिँदै प्रदेशको सेवामा जुट्न आह्वान गरेका छन् । यो सरकारले उत्तर प्रदेशलाई उत्तर प्रदेश बनाउनेमा कुनै कसर बाँकी राख्न नहुने निर्देश पनि दिएका छन् । प्रधानमन्त्री मोदीले भने, ‘विकास नै हाम्रो एक मात्र लक्ष्य हो । उत्तर प्रदेशले विकास गरे मात्र भारतको विकास हुनेछ । हामी युवाको सेवा गर्न चाहन्छौं र उनीहरूका लागि अवसरको सृजना गर्न चाहन्छौं ।’

सम्पन्न भारत निर्माणमा आफ्नो अटल प्रयास जारी रहने उनको भनाइ थियो । नयाँ सरकारले भारतको परिवर्तन गराउने उनले विश्वास व्यक्त गरे । नरेन्द्र मोदी र भाजपा अध्यक्ष अमित शाह समेत थुप्रै वरिष्ठ नेताहरू उपस्थित समारोहमा उत्तर प्रदेशका राज्यपाल राम नाईकले नयाँ सरकारका मुख्यमन्त्री, उपमुख्यमन्त्रीद्वय र मन्त्रीहरूलाई शपथ ग्रहण गराएका थिए ।

योगीको मन्त्रिण्डलमा २२ मन्त्रीसहित ४४ जना सदस्य छन् । मन्त्रिपरिषद्मा राज्यमन्त्रीमा पूर्वक्रिकेटर मोहसिन रजा पनि छन् । योगी सरकारमा उनी मात्र मुस्लिम मन्त्री हुन् । भाजपाले उत्तर प्रदेशको विधानसभा निर्वाचनमा एकजना पनि मुस्लिम उम्मेदवार बनाएको थिएन । यसै विषयलाई लिएर कंग्रेस आई, समाजवादी र बहुजन समाजवादी पार्टीले भाजपा मुस्लिमविरोधी भएको आरोप लगाउँदै आएका थिए ।

उनले उत्तर प्रदेशमा आफ्नो शपथ ग्रहणले निकै महत्व राख्ने र यो ऐतिहासिक दिन ठहर्ने उनले बताए । विकासका लागि जोसुकै कदम उठाउन आफू र आफ्नो सरकार तयार रहेको उनले दाबी गरे । आफ्नो सरकारले कसैलाई पनि भेदभाव नगर्ने स्पष्ट पारेका छन् । उनले भने, ‘लोक कल्याणप्रति समर्पित यो सरकार भेदभावविना समाजका सबै वर्गका लागि समान रूपले काम गर्नेछ । प्रशासनलनई संवेदनशील एवं जवाफदेही बनाइनेछ ।’
आवास, भोजन, पिउने पानी, शौचालय जस्ता अत्यावश्यक आधारभूत आवश्यकता पूर्तिका साथै कानुन व्यवस्था कायम गर्ने उनले आश्वासन दिए ।

सरकारी सेवा र नियुक्तिलाई पारदर्शी र भ्रष्‍टाचारमुक्त बनाइने विश्वास दिलाए । महिलाको सुरक्षामा ध्यान दिइने र गरिब, दलित और पिछडा वर्गका लागि आफ्नो सरकारले तत्काल काम सुरु गर्ने उनले जानकारी दिए ।
समारोहमा समाजवादी पार्टीका संरक्षक मुलायमसिंह यादव र पूर्व मुख्यमन्त्री अखिलेश यादव पनि उपस्थित थिए । उत्तर प्रदेशमा जित हात पारेकोमा मुलायमले मोदीलाई बधाई दिएका थिए ।

योगीका महत्वपूर्ण घटना
उनको आपचारिक नाम भने अजय सिंह नेगी हो ।
सन् १९७२, जुन ५ः उत्तराखण्ड (तत्कालीन उत्तर प्रदेश)को पौडी जिल्लास्थित पञ्चुर गाउँमा जन्म ।
सन् १९८७ः टिहरीबाट दश कक्षा उत्तीर्ण ।
सन् १९८९ः ऋषिकेशस्थित भरत मन्दिर इन्टर कालेजबाट प्रमाणपत्र उत्तीर्ण ।
सन् १९९०ः एबीवीपीमा संलग्न ।
सन् १९९२ः बीएस्सी ।
सन् १९९३ः एमएस्सीको शोधपत्रमा गुरु गोरखनाथमाथि अनुसन्धान गर्न गोरखपुर प्रस्थान । गोरक्षनाथ पीठका महन्त अवेद्यनाथसँगको संगत ।
सन् १९९४ः पूर्ण संन्यासी । अजय सिंह नेगीबाट योगी आदित्यनाथमा परिवर्तन ।
सन् १९९८ः गोरखपुरबाट भाजपाका तर्फबाट सांसद ।
सन् १९९९ः गोरखपुरबाट दोस्रोपल्ट सभासद् ।
सन् २००२ अप्रिलः हिन्दू युवा वाहिनी गठन ।
सन् २००४ः तेस्रोपटक सभासद् ।
सन् २००७ः  गोरखपुर दंगाका योजनाकारको आरोपमा जेल, दशौं मुद्दा ।
सन् २००८ सेप्टेम्बर ७ः योगीमाथि भीषण आक्रमण ।
सन् २००९ः चौथोपटक सभासद् ।
सन् २०१४ः पाँचौंपटक सभासद् ।
सन् २०१७ मार्च १९ःउत्तर प्रदेशको भाजपा संसदीय दलको नेता चयन ।
सन् २०१७ मार्च २०ःउत्तर प्रदेशका मुख्यमन्त्री पदको शपथ ।