कम्युनिष्ट पार्टीमा ७० वर्षपछि ‘भत्ता'
काठमाडौः नेत्रविक्रम चन्द ‘विप्लव'नेतृत्वको नेपाल कम्युनिष्ट पार्टीले ७० बर्ष उमेर पुगेका आफनो पार्टीका नेताहरुलाई सक्रिय राजनीतिबाट विदा गरी जीवन निर्वाह भत्ता दिने निर्णय गरेको छ । सो पार्टीका नेतात्रय इश्वरी दाहाल,चित्रबहादुर आले र राम लखनले मासिक पाँच हजार रुपैया जीवन निर्वाह भत्ता पाउने भएका छन् ।
नुवाकोटको थानसिङमा पाँच दिनसम्म सञ्चालन भइ सकिएको सो पार्टीको केन्द्रीय समिति वैठकले चैतदेखि लागु हुने गरी जीवन निर्वाह भत्ता दिने निर्णय गरेको हो । जीवनभर राजनीति गरेका बृद्ध नेताहरुको जीवनलाई सहज बनाउन जीवन निर्वाह भत्ता दिने निर्णय गरिएको सो पार्टीका नेताहरुले बताएका छन ।
सो पार्टीका नेता माइला लामाले अन्नपूर्णसँग भने ‘लामो समय राजनीति गरेका तर जीवनको उत्तरार्धमा वेहालपूर्ण अवस्था हुने गरेको छ । त्यसलाई सच्याएर बृद्ध नेताहरुलाई संरक्षण गर्न सामान्य अवस्थामा मासिक पाँच हजार र आवश्यकता अनुसार थप्न सकिने गरी निर्णय गरेका छौ ।' वामपन्थी राजनीतिमा लामो समय विताएकाहरुलाई सम्मान गर्ने नीति पनि बनाइएको लामाले जानकारी दिए । बृद्ध नेताहरुलाई जीवन निर्वाह भत्ता दिने निर्णय यसअघि अरु कुनै पार्टीले गरेका छैनन ।
काठमाडौमा उदघाटन गरी रोल्पाको थवाङमा बन्दसत्र भएको सो पार्टीको आठौ महाधिवेशनले सक्रिय राजनीतिबाट अविभावकीय भूमिकामा पुगेका नेताहरुलाई जीवन निर्वाह भत्ता उपलब्ध गराउने नीति पारित गरेको थियो ।
नेताहरुको भरणपोषणका लागि केन्द्रीय तहमा अक्षयकोष स्थापना गर्ने निर्णय पनि सो पार्टीले गरेको छ । अक्षय कोषको व्याजबाट प्राप्त हुने रकमलाई बृद्ध नेताहरुको जीवन निर्वाह भत्ताको रुपमा उपलब्ध गराउने व्यवस्था सो पार्टीले मिलाएको छ । तत्कालका लागि १० लाख रुपैयाको अक्षयकोष स्थापना गर्न लागिएको सो पार्टीले जनाएको छ ।
जीवन निर्वाह भत्ता पाउन लागेका तीनै जना नेताले सो पार्टीको स्थायी समिति सदस्यबाट विदा लिएका छन भने उनीहरु सल्लाहकारको भूमिकामा पुगेका छन । जीवन निर्वाह भत्ता पाउन लागेका चित्रबहादुर आलेलाई सर्लाहीको हरिवनमा दुई कोठे घर पार्टीको आन्तरिक स्रोतबाट बनाइदिने निर्णय पनि गरिएको लामाले बताए ।
सो पार्टीले संगठन विभागको जिम्मेवारी गरेको छ । वैकल्पिक सहित ५९ सदस्यीय केन्द्रीय समितिमा पाँच जनाको स्थायी समिति र १३ जनाको पोलिटब्यूरो वनाउने निर्णय गरेको छ । कृष्ण अधिकारी,मोहन कार्की र चन्द्रवहादुर चन्दलाई बढुवा गरी पोलिटव्यूरोको संख्या १३ सदस्यीय बनाइएको छ । यसअघि १० सदस्यीय पोलिटब्यूरो थियो । आठौं महाधिवशेनको निर्णयलाई गाउ तहसम्म पुर्याउन सो पार्टीले मुख्य मुख्य शहरमा सन्देश सभा गर्ने निर्णय पनि गरेको छ ।
सरकारले बैशाख ३१ गतेका लागि घोषणा गरेको स्थानीय तहको चुनावलाई खारेज गर्ने गरी आफना गतिबिधि बढाउने निर्णय गरेको छ । ‘चुनावको अर्थ छैन । यसलाई खारेज गर्नुपछ' लामाले भने । आठौं महाधिवेशनको निर्णय कार्यान्वयन र पछिल्लो राजनीतिक घटनाक्रमका विषयमा समीक्षा गर्न वसेको वैठकले चुनाव हुन नदिने गरी योजना बनाएको अर्का एक नेताले बताए । सरकारलाई चुनाव नगराउन,उम्मेद्धवारहरुलाई चुनावमा नउठाउन, मतदातालाई चुनावमा मतदान नगर्न आग्रह गर्ने र त्यसो गर्दा पनि नभए अन्य विकल्प प्रयोग गरेर भए पनि चुनाव विथोल्ने गरी कार्यक्रम बनाएको ती नेताले बताए।
प्रतिक्रिया दिनुहोस !
