रेसनारी नेसनल च्याम्पियनसिप
काठमाडौं : रेसनारी नेसनल च्याम्पियनसिप २०१७ मोटो स्कुटर रेसिङ शनिबार सम्पन्न भएको छ । उक्त प्रतियोगितामा दीक्षा श्रेष्ठले प्रथम स्थान हासिल गरिन् । त्यसैगरि वर्षा बस्नेतले दोस्रो र सुनिता देसार तेस्रो भएको आयेजकले जनाएको छ । ललितपुरको सातदोबाटोस्थित स्वीमिङ पुल कम्प्लेक्समा आयोजना भएको उक्त रेसिङ च्याम्पियनसिपमा २१ जना महिला राइडरले एक सय १० सीसीको होन्डा नाभी कुँदाएका थिए ।
प्रतियोगिताका विजयी खेलाडीलाई क्रमशः १० हजार, सात हजार र पाँच हजार नगद, शिल्ड र प्रमाणपत्र प्रदान गरिएको थियो । मोटरसाइकल रेसिङका प्रथम विजेतालाई आगामी वर्ष मलेसिया÷थाइल्यान्डमा हुने एसियाली स्तरको रेसिङमा भाग लिन पठाउने व्यवस्था छ । विजयी खेलाडीलाई राष्ट्रिय खेलकुद परिषद्का बोर्ड सदस्य राजेन्द्र श्रेष्ठले पुरस्कार तथा प्रमाणपत्र प्रदान गरेका थिए ।
ओमन इन स्पोर्ट एन्ड एडभेन्चर भन्ने देशब्यापी अभियान सञ्चालन गरिरहेको नेपाल अटोमोबाइल्स एसोसिएसन (नासा) अन्तर्गतको नेपाल मोटरसाइकल फेडरेसन क्लबले सो प्रतियोगिता आयोजना गरेको हो । रेसिङ कार्यक्रम गत वर्षदेखि आयोजना हुँदै आएको छ । नेपालकै लागि नयाँ, रोमाञ्चकारी र साहसिक मानिने उक्त रेसनारी प्रतियोगिता महिला बाइक राइडरलाई लक्षित गरी सञ्चालन गरिएको हो ।
प्रतिक्रिया दिनुहोस !
