नुवाकोटमा मिनिट्रक दुर्घटना : एकको मृत्यु, पाँच घाइते
नुवाकोट : नुवाकोटको पूर्वी भेगमा रहेको मदानपुरमा बिहीबार मिनिट्रक दुर्घटना हुँदा एक जनाको मृत्यु भएको छ भने पाँच जना घाइते भएका छन्।
सदरमुकाम विदुरदेखि १४ किलोमिटर पूर्वमा रहेको बेलकोटगढी नगरपालिका १२ बाँझडी मदानपुरमा वासुकीतर्फ जाँदै गरेको बा ४ ख २४८४ नम्बरको मिनिट्रक दुर्घटनामा परेको हो।
दुर्घटनामा सोही स्थानका ७० बर्षीय भीमनाथ रिमालको घटनास्थलमै मृत्यु भएको जिल्ला प्रहरी कार्यालय नुवाकोटले जनाएको छ। दुर्घटनामा स्थानीय पाँच घाइते भएको जिल्ला प्रहरी प्रमुख प्रहरी उपरीक्षक देवबहादुर बोहराले जानकारी दिए।
दुर्घटनामा चालक नुवाकोट दुइपिपलका २८ बर्षीय राजकुमार भुजेल, बेलकोटगढी नगरपालिका १२ का १४ बर्षीय सुजन पाठक, ३४ बर्षीय रामचन्द्र रिमाल, ३८ बर्षीय श्यामबहादुर तामाङ र ४२ बर्षीय राधाकृष्ण सिलवाल घाइते भएको प्रहरीले जानकारी दिएको छ। ढुंगा लिन जांदै गरेको सो मिनिट्रक गुडेको १० मिनेटमै दुर्घटनामा हुँदा सडकबाट १० मिटर तल खसेको स्थानीयले बताए।
घाइते भएका चार जनाको नुवाकोट जिल्ला अस्पताल त्रिशूली र चालकको विदुरस्थित नुवाकोट सिटी अस्पताल एण्ड रिसर्च सेन्टरमा उपचार भइरहेको नुवाकोट प्रहरीले जनाएको छ।
प्रतिक्रिया दिनुहोस !
